बलिउड अभिनेता राजपाल यादव हाल ९ करोड रुपैयाँ ऋण र चेक बाउन्स प्रकरणका कारण गम्भीर आर्थिक संकटमा छन् र उनी अहिले ‘तिहाड’ जेलमा छन्। अदालतमा आत्मसमर्पण गर्नुअघि राजपालले सार्वजनिक रूपमा आफ्ना आर्थिक संघर्षबारे भावुक अभिव्यक्ति दिएपछि यो विषय व्यापक चर्चामा आएको थियो।
यही कठिन समयमा अभिनेता सोनु सूद राजपाल यादवको साथमा उभिएका छन्। सोनुले राजपाललाई आफ्नो आगामी फिल्ममा भूमिका दिने मात्र होइन, साइनिङ अमाउन्टसमेत उपलब्ध गराउने घोषणा गरेका छन्, ताकि उनलाई तत्काल आर्थिक सहयोग मिलोस्। सोनु सूदले फिल्म उद्योगलाई समेत अपिल गर्दै भनेका छन्-“यो समयमा राजपाल यादवले एक्लो महसुस गर्नु हुँदैन। फिल्म उद्योगले उसलाई साथ दिनुपर्छ।”
उनको यो कदमलाई सामाजिक सञ्जालमा व्यापक प्रशंसा गरिएको छ। लामो समयदेखि बलिउडमा कमेडी भूमिकामार्फत दर्शकको मन जित्दै आएका राजपाल यादवको यो कठिन अवस्था उनका प्रशंसकका लागि पनि भावनात्मक बनेको छ। सोनु सूदको सहयोगले राजपाललाई मात्र होइन, सम्पूर्ण फिल्म उद्योगमा मानवता र सहानुभूतिको सन्देश दिएकोछ। यो घटनाले एकपटक फेरि सोनु सूदलाई केवल अभिनेता मात्र नभई संकटमा परेकाको सहारा बन्ने व्यक्तित्वका रूपमा स्थापित गरेको छ।
