नेतृत्वको महत्वपूर्ण कार्यहरू मध्ये जनता सँग प्रत्यक्ष भेटघाट र संवाद पनि एक प्रमुख पक्ष भएको बताउँदै नेताले आजको दिन विचार आदान–प्रदानबाट सुरु गरिएको जानकारी दिएका छन्। उनका अनुसार जब नेताहरूले जनतासँग संवाद गर्छन्, तब विचारको आदान–प्रदान हुन्छ र त्यही विचार भविष्यमा ठूला परिवर्तनको आधार बन्ने विश्वास व्यक्त गरिएको छ।आज बिहान सोनादाबाट आएका स्वयं सहायता समूह (SHG) का सदस्यहरूसँग आर्थिक गतिविधि तथा स्वरोजगारको सम्भावनाबारे विस्तृत छलफल गरिएको उनले बताएका छन्। उक्त भेटघाटका क्रममा स्थानीय स्तरमा आर्थिक गतिविधि कसरी सशक्त बनाउन सकिन्छ, महिलाहरूलाई स्वरोजगारसँग कसरी जोड्न सकिन्छ तथा साना व्यवसायहरूलाई कसरी प्रोत्साहन गर्न सकिन्छ भन्ने विषयमा मन्थन भएको जानकारी दिइएको छ।
त्यसैगरी, सोनादा हनुमान समिति तथा सोनादा मिलन समाजका प्रतिनिधिहरूसँग सामाजिक विषयवस्तुका बारेमा पनि छुट्टै छलफल गरिएको उनले बताएका छन्। स्थानीय स्तरमा सामाजिक एकता कायम राख्ने, युवाहरूलाई सकारात्मक दिशामा अघि बढाउने तथा समाजमा देखिएका विभिन्न समस्याहरूलाई समाधान गर्ने विषयमा प्रतिनिधिहरूसँग विचार आदान–प्रदान गरिएको जनाइएको छ।
आगामी चुनाव नजिकिँदै गएको सन्दर्भमा राजनीतिक विषयमा पनि छलफल भएको बताइएको छ। सो अवसरमा नेताले BGPM लाई सहयोग गर्न सर्वसाधारणसँग अपील गरेका छन्। क्षेत्रीय पहिचान र क्षेत्रीयताको संरक्षण नै आफ्नो दलको मुख्य राजनीतिक अडान रहेको उल्लेख गर्दै चुनावमा BGPM को विजय क्षेत्रको समृद्धि र विकासका लागि महत्वपूर्ण हुने स्पष्ट पारेका छन्। उनका अनुसार BGPM वचन र आश्वासन मात्र दिने राजनीति गर्ने दल नभई रचनात्मक तथा व्यावहारिक राजनीति गर्ने पार्टी हो।
वर्तमान राजनीतिक परिस्थितिमा क्षेत्रीय मुद्दा र पहाडको विकासका लागि प्रतिपक्षमा बसेर केवल आलोचना गर्ने राजनीति पहाडको हितमा नहुने उनले बताएका छन्। बरु सत्ता सँग सहकार्य गर्दै पहाडको विकासका लागि काम गर्ने नीति अपनाइएको उनले स्पष्ट पारेका छन्। अन्त्यमा उनले पहाडका सबै मतदाताहरूले क्षेत्रको विकास र समृद्धिका लागि सही निर्णय लिने विश्वास व्यक्त गरेका छन्। समृद्धि चाहने मतदाताहरूले BGPM को सोच र योजनालाई समर्थन गर्ने विश्वास व्यक्त गर्दै उनले जनताको विश्वास र भरोसालाई कुनै हालतमा तोड्ने छैन भन्ने प्रतिबद्धता पनि व्यक्त गरेका छन्।
