दार्जीलिङका सांसद भारतीय जनता पार्टीका तथा राष्ट्रिय प्रवक्ता, राजु विष्टले भोली जनवरी १७ मा, प्रधानमन्त्री मोदीले कोलकातालाई गुवाहाटीसँग जोड्ने भारतको पहिलो वन्दे भारत रेललाई झण्डा देखाएर उद्घाटन गर्ने जानकारी दिएका छन्। विष्टले, प्रधानमन्त्री नरेन्द्र मोदीको नेतृत्वमा, एक नयाँ भारत आकार लिइरहेको बताउँदै एक साहसी, उत्तम र आधुनिक भारत, अनि दार्जीलिङ पहाडहरू, तराई र डुवर्स प्रधानमन्त्री मोदीको आर्थिक र पूर्वाधार विकास दृष्टिकोणको अगाडि र केन्द्रमा रहेको बताएका छन्।
यो हावडा-मालदा टाउन-न्यू जलपाईगुडी-न्यू कुचबिहार-न्यू बोंगाईगाउँ-गुवाहाटी (कामाख्या) रुटमा चल्नेछ। यसका अतिरिक्त, प्रधानमन्त्री मोदीले हाम्रो क्षेत्रबाट छ वटा नयाँ रेलहरूलाई झण्डा देखाउनुहुनेछ: जसमा नयाँ जलपाईगडी – नागरकोइल अमृत भारत एक्सप्रेस, नयाँ जलपाईगडी – तिरुच्चिरापल्ली अमृत भारत एक्सप्रेस, अलिपुरद्वार – SMVT बेंगलुरु अमृत भारत एक्सप्रेस, अलिपुरद्वार – मुम्बई (पनवेल) अमृत भारत एक्सप्रेस, राधिकापुर – SMVT बेंगलुरु एक्सप्रेस अनि बालुरघाट – SMVT बेंगलुरु एक्सप्रेस रहेका छन्। यी नयाँ रेल सेवाहरूले हाम्रो क्षेत्रका मानिसहरूको लागि यात्रालाई सजिलो र किफायती बनाउने सांसद विष्टले बताएका छन्।
कोरोनेसन पुलको विकल्पको लागि टेन्डर पहिले नै जारी गरिएको छ। यसबाहेक राष्ट्रिय राजमार्ग पूर्वाधार विकास निगम लिमिटेड (NHIDCL) ले सिलगडीदेखि दार्जीलिङसम्मको वैकल्पिक राजमार्गको लागि सम्भाव्यता प्रतिवेदन र विस्तृत परियोजना प्रतिवेदन (DPR) र पूर्व-निर्माण गतिविधिहरूको तयारीको लागि टेन्डर बुझाउन २१ जनवरी, २०२६ को समयसीमा तोकेको छ।
यी परियोजनाहरू पुरा भएपछि हाम्रो क्षेत्रमा यात्रा, पर्यटन र पहुँचलाई रूपान्तरण गर्नेछ। हाम्रो क्षेत्र र दार्जीलिङ पहाड, तराई र डुवर्सका मानिसहरूको लागि निर्बाध कनेक्टिभिटी सुनिश्चित गर्ने हाम्रो सामूहिक प्रयासहरू निरन्तर रहने सांसद विष्टले जनाएका छन्।
उनले युवाहरूलाई जीविकोपार्जनका अवसरहरूको खोजीमा बाहिर बसाइँ सर्नु नपरोस्, हाम्रो क्षेत्रको प्रगति होस् र यो सम्पूर्ण भारतको सबैभन्दा शान्तिपूर्ण र प्रगतिशील क्षेत्र बनोस् भन्ने कुरा सुनिश्चित गर्न काम गरिरहेको बताए।
