डुवर्सको गौरव तथा राजवंशी समुदायका गर्व, पद्मश्री सम्मानबाट सम्मानित प्रसिद्ध लोकगायक मंगला कान्ता राय, जसलाई सबैले प्रेमपूर्वक “मोरोग दादु” भनेर चिन्थे, अब हाम्रो बीचमा रहनुभएन। उनको निधनको खबरले सम्पूर्ण उत्तर बंगाल मात्र होइन, संगीत र लोकसंस्कृतिलाई माया गर्ने हरेक मन भावुक बनेको छ। आफ्नो अनौठो आवाज, मौलिक शैली र लोकसंगीतप्रतिको समर्पणमार्फत उनले राजवंशी समुदायको संस्कृति, परम्परा र पहिचानलाई देशभर चिनाएका थिए।मोरोग दादुको गीत केवल मनोरञ्जनको माध्यम थिएनन्, ती उत्तर बंगालको माटो, भावना, संघर्ष र संस्कृतिको आत्मा थिए। गाउँघरदेखि शहरसम्म, वृद्धदेखि युवापुस्तासम्म, सबैको मनमा उनले विशेष स्थान बनाएका थिए। उनका गीतहरूले लाखौं मानिसलाई आफ्नो भाषा, संस्कृति र पहिचानप्रति गर्व गर्न सिकाए।
पद्मश्री सम्मान प्राप्त गर्नु केवल उनको व्यक्तिगत उपलब्धि मात्र थिएन, त्यो सम्पूर्ण राजवंशी समुदाय र उत्तर बंगालको लोकसंस्कृतिको सम्मान थियो। उनले आफ्नो जीवन लोककला र सांस्कृतिक संरक्षणमा समर्पित गरे, जसका कारण उनी सधैं जनमानसमा अमर रहनेछन्। आज उनको बिदाइसँगै उत्तर बंगालको सांगीतिक आकाशमा एउटा युगको अन्त्य भएको अनुभूति भइरहेको छ। विभिन्न क्षेत्रका मानिसहरूले सामाजिक सञ्जालमार्फत श्रद्धाञ्जली अर्पण गर्दै उनको आत्माको चिरशान्तिको कामना गरिरहेका छन्। ईश्वरले दिवंगत आत्मालाई शान्ति प्रदान गरून् र शोकसन्तप्त परिवार तथा शुभचिन्तकहरूलाई यो पीडा सहने शक्ति दिऊन्।
