दार्जीलिङमा राष्ट्रपति भ्रमण शुभ संकेत

दार्जीलिङ, 5 मार्च(मार्च): बुधबारको दिन प्राप्त समाचार अनुसार आगामी 6 मार्चको दिन भारतका सम्माननीय राष्ट्रपति द्रौपदी मुर्मु भ्रमण रहेको शुभ संकेत मान्दै गोर्खा वेलफेयर वुमन फोरमका अध्यक्षा कविता प्रधान र कन्भेनर कृष्ण प्रधान प्रेरणा हर्षित बनेका छन्। उनीद्वयले बताए अनुसार, दार्जीलिङमा ऐतिहासिक क्षण राष्ट्रपति द्रौपदी मुर्मुको भ्रमण दार्जीलिङको इतिहासमा पहिलो पटक भारतको राष्ट्रपति आउनु केवल औपचारिक भ्रमण मात्र होइन, यो हाम्रो पहाड़को सम्मान र पहिचानसँगै जोड़िएको गौरवपूर्ण क्षण हो।
अध्यक्ष कविता प्रधान र कन्भेनर कृष्ण प्रधान प्रेरणाले बताए अनुसार,राष्ट्रपति द्रौपदी मुर्मु एक सरल र परिष्कृत व्यक्तित्वका रूपमा चिनिन्छ। साधारण परिवारबाट उठेर देशको सर्वोच्च पदसम्म पुग्नु ईश्वरको आशीर्वाद र उनको संघर्ष, इमान्दारिता र समर्पणको प्रेरणादायी उदाहरण हो। उनको जीवन यात्राले महिला सशक्तिकरण र सामाजिक समानताको सन्देश दिन्छ।दार्जीलिङ जस्तो विविध संस्कृति र इतिहास बोकेको ठाउँमा उनको आगमनले राष्ट्रिय एकता र आपसी सद्भावनालाई अझ बलियो बनाउने विश्वास लिइएको छ। विशेषगरी पहाड़का महिला युवावर्ग र सामाजिक संस्थाहरूको लागि उहाँको उपस्थिति प्रेरणाको श्रोत बन्नेछ। दार्जीलिङवासीको लागि यो अवसर गर्व र सम्मानको क्षण हो। उनको भ्रमणले विकास, संवाद र सहकार्यको नयाँ ढोका खोलिने अपेक्षा गरिएको छ। यो ऐतिहासिक भ्रमणले दार्जीलिङको आत्मासम्मानलाई नयाँ ऊचाईमा पुर्‍याउँदै भविष्यका लागि आशा र विश्वासको दीप प्रकाशित गरेको छ। यो क्षण दार्जीलिङको इतिहासमा सुनौलो अक्षरले लेखिनेछ भनी अध्यक्ष कविता प्रधान र कन्भेनर कृष्ण प्रधान प्रेरणाले भनेका छन्।