भारतकी राष्ट्रपति द्रौपदी मुर्मु ले शनिबार दार्जिलिङ जिल्लाको विधाननगर क्षेत्रको भ्रमण गर्दै सन्तोषिनी विद्याचक्र विद्यालयको प्रवेशद्वारमा वृक्षारोपण गरेकी छन्। राष्ट्रपतिको यस भ्रमणलाई स्थानीय आदिवासी समुदायसँग भेटघाट तथा उनीहरूप्रति सम्मान प्रकट गर्ने उद्देश्यसँग जोडेर हेरिएको छ।
दार्जिलिङका सांसद राजु विष्ट ले जारी गरेको प्रेस विज्ञप्तिअनुसार फाँसिदेवाको विधाननगरमा अन्तर्राष्ट्रिय सन्थाल सम्मेलन आयोजना गर्ने तयारी गरिएको थियो। तर पश्चिम बंगाल सरकार तथा प्रशासनले आदिवासी बहुल क्षेत्रमा कार्यक्रम गर्न अनुमति नदिएको आरोप लगाउँदै सम्मेलनको स्थान परिवर्तन गर्नुपरेको जनाइएको छ।
सांसद बिष्टका अनुसार राष्ट्रपति मुरमु करिब ३० किलोमिटर यात्रा गरेर विधाननगर पुगेकी थिइन् र स्थानीय आदिवासी समुदायसँग भेटघाट गरेकी थिइन्। उनले राष्ट्रपतिको उपस्थितिलाई क्षेत्रका जनताका लागि सम्मानको विषय भएको उल्लेख गर्दै कृतज्ञता व्यक्त गरेका छन्।
यसैबीच बिष्टले राष्ट्रपतिको भ्रमणका क्रममा पश्चिम बंगाल सरकारले आवश्यक शिष्टाचार र प्रोटोकल पालना नगरेको आरोप लगाएका छन्। उनका अनुसार सामान्यतः राष्ट्रपतिको स्वागतका लागि विमानस्थलमा मुख्यमन्त्री, मुख्य सचिव वा वरिष्ठ मन्त्री उपस्थित हुने प्रोटोकल रहे पनि उक्त अवसरमा राज्य सरकारका कुनै पनि मन्त्री उपस्थित नभएको उनले बताएका छन्।
सांसद बिष्टले यस घटनालाई राष्ट्रपतिको मात्र नभई सम्पूर्ण देशका नागरिक, सन्थाल तथा आदिवासी समुदायप्रति अपमानजनक व्यवहार भएको टिप्पणी गरेका छन्। उनले दार्जिलिङ पहाड, तराई र डुआर्स क्षेत्रका जनभावनाप्रति राज्य सरकारले पटक–पटक बेवास्ता गरेको आरोपसमेत लगाएका छन्।
