खरसाङ, (निस)ः सोमवार साँझको हुरी-बतासले उढ़ाइदिएको विभिन्न सामग्री बटुल्न अनि उड़ाएर ल्याएको कसिङ्गर सफा गर्न खरसाङ्का धेरै मानिसहरूले सोमवार दिनभर खर्चिए। हुरी-बतासले खरसाङ्को विभिन्न स्थानमा क्षति गरेको छ। कतिपय मानिसहरूको टीनको छानु उढ़ाइदिएको छ भने धेरै मानिसहरूको बरण्डा, रेलिङ, छतमा राखिएको फूलका गमलाहरू आइतवार साँझको हुरी-बतासले उढ़ाइदिएको छ।
खरसाङ्का धेरै फूल कृषक अनि फूलप्रेमीहरूले सोमवार साँझको हुरी बतासले फूलहरू क्षतिग्रस्त भएको बताएकाछन्। खरसाङ बजारको राष्ट्रिय राजमार्गमा फूल अनि फूलका बिरुवा बिग्री गरिरहेका बरबुङ निवासी फूल कृषकले आफ्नो टोइलेटको छतमा राखेको सम्पूर्ण फूल असिनाले बिगार गरिदिएको बताएका छन्। तिनले सोमवारको हुरीमा आफ्नो नर्सरीमा रहेका धेरै फूल गमलासहित क्षतिग्रस्त बनाइदिएको बताए। डुमाराम बस्तीकी एक फूल कृषकले सोमवार साँझको हुरी-बतासले आफूले रोपेको फूलको धेरैवटा गमला उढ़ाइदिएर क्षतिग्रस्त बनाएको बताइन्। तिनले भनिन्, हुरी-बतास आउन थालेपछि रेलिङ र बरण्डामा राखिएका फूलका गमलाहरू एकपछि अर्को गर्दै उढ़ाउन थाल्यो। यस्तै हुरी-बतासको सामना गर्दै भए पनि फूलका गमलाहरू घरभित्र राखेर जोगाएँ। सोमवार साँझको हुरी बतासले उढ़ाएर ल्याएको कसिङ्गर सफा गर्न घरभित्र ल्याएको फूलको गमलाहरू पुनः अघिको स्थानमा राख्नलाई दिनभर लाग्यो। यसरी नै खरसाङ शहरी क्षेत्रमा सोमवार साँझको हुरी-बतासले फूल रोप्नलाई बनाइएको छाजन, बरण्डमा पानी नआवोस भनी लगाइएको प्लास्टि वा टीनको छानु उढ़ाइदिएको धेरै घटनाहरू प्रकाशमा आएको छ।
डुमाराम बस्तीकी एक व्यक्तिले सोमवार साँझको हुरी बतासले आफ्नो घरको छानु उढ़ादिएपछि हरिबिजोक बनाएको बताए। हुरी-बतासले यहाँको रिलायन्स स्मार्ट बजार नजिक एउटा रुख ढलेर राष्ट्रिय राजमार्ग 110 केही समयको निम्ति बन्द भएको थियो। अग्निशमन विभाग अनि प्रशासनको सक्रियतामा यसलाई रातिनै खोलियो। खरसाङ्को धर्मशालादेखि डाउहिल हुँदै चिम्नी, देवराली भएर बाघगौड़ा निस्कने ओल्ड मिलिटेरी रोडमा पनि धेरै स्थानमा रुखका साना-ठूला हाँगा झरेर सड़क बिहानसम्म अवरुद्ध भएको जानकारी पाइएको छ। साँझको हुरी बतासले तीनधारे क्षेत्रको चुनभट्टीमा एउटा रुख ढलेर राष्ट्रिय राजमार्ग 110 अवरुद्ध बनेको थियो भने मकैबारी चिया बगान क्षेत्रमा पङ्खाबारी रोडमा एउटा ठूलो रुख ढलेकोले यो रोड पनि केही समयको निम्ति बन्द भएको थियो। तथापि सोमवार साँझको हुरी बतासमा कुनै हताहत भएको अथवा घाइते भएको जानकारी प्राप्त भएन। खरसाङ शहरी क्षेत्रमा सोमवार सामन्य रुपले गाड़ी चलाचल भयो। हुरी बतासले विभिन्न स्थानमा बिजुलीको खाँबो ढलेको र तार चुढ़ाइदिएकोले साँझदेखिनै बिजुलीको आपूर्ति ठप्प बनेको थियो भने मंगलवार दिउँसो लगभग 1 बजेदेखि बिजुलीको आपूर्ति पनि सामान्य बन्यो।
