खरसाङ, (निसं): खरसाङको पङ्खाबारी रोड कहिले मरम्मती हुने भनी जनसाधरणले प्रश्न र प्रतिक्षा गरिरहेका छन्। वर्तमानमा पङ्खाबारी रोड विभिन्न स्थानमा भत्किएको अवस्थामा रहेको छ। रोड भत्किएर अलकत्राको पीच उप्किएर कतिपय स्थानमा ठूलो खाल्डा बनेको छ। भत्किएको रोडमा रहेको खाल्डाको कारण चालकवर्ग, जनसाधरण, दुईचक्के सवारहरू समस्यामा परेका छन्। रोडमा रहेका यस्ता खाल्डाहरू गाड़ीले पार गर्दा गाड़ी चढ़ेका यात्रीहरू थेचारिन्दा यो रोड कहिले मरम्मती हुने हो भनी यात्रीहरू कराउदै प्रश्न गर्ने गरेका छन्।
वर्तमानमा पङ्खाबारी रोडलाई रोहिणी रोडपछिको व्यस्त रोड मानिन्छ। यो रोडमा दैनिक सैकड़ौँ गाड़ी चल्ने गर्छ। सिलगढ़ी गामी गाड़ी यसै रोडबाट पठाइने यातायत नियम छ। खरसाङ महकुमा शासकको कार्यालय, खरसाङ थाना, खरसाङ खण्डविकास अधिकारीको कार्यालय, खरसाङ सुधारगृह, खरसाङ पशु चिकित्सालय, खरसाङ खाद्य एवं आपुर्ति विभागको कार्यालय, भूमि अनि भूमि सुधार विभागको कार्यालय, खरसाङ महकुमा अदालत, खरसाङ ट्रेजरी लगायत विभिन्न विभागीय कार्यालयहरू पङ्खाबारी रोडमा रहेका छन्। यी कार्यालयका अधिकारीहरूको गाड़ी यसै रोडमा चल्ने गर्छ। यसको अतिरिक्त मिरिक, दुधे, गाड़ीधुरा, पानीघट्टा, नेपाल अनि विभिन्न स्थानबाट खरसाङ आउ-जाउ गर्ने गाड़ी यसै रोडमा चल्ने गर्छ। यस्तो महत्व बोकेको रोडको मरम्मती अहिलेसम्म नहुनुमा मानिसहरूले आश्चर्य पनि प्रकट गर्ने गरेका छन्।
पङ्खाबारी रोड खरसाङ बजारको पुरानो रेलवे प्रेस नजिकदेखि ओह्रालो विभिन्न स्थानमा भत्किएको छ भने फाटक डाँड़ाको कक्रेन प्यालेस नजिक गत वर्ष 4 अक्टोबरको घनघोर वर्षामा गएको पैह्रोको पनि अहिलेसम्म मरम्मती गरिएको छैन। यो रोडमा गाड़ी चलाउने एक चालकले रोडको अवस्थाको बारेमा दुःख प्रकट गर्दै रोड भत्किएर बनेको खाल्डाबाट गाड़ी पार गर्दै निकै होसियारी अपनाउन पर्ने, गाड़ीको स्प्रीङ भाचिने डर रहने गरेको बताए। तिनले भने, पङ्खाबारी रोड वर्तमानमा धेरै स्थानमा भत्किएको छ। रोड भत्किएर खाल्ड बनेको स्थानमा पानी जमिने गरेकाले गल्तीले गाड़ीले पानी उछिट्याएर हिँड़िरहेका मानिसलाई लागेको खण्डमा गाली खानु पर्छ। यो रोडको महत्वलाई हेरेर रोडको रखरखाउ असल हुन पर्ने हो, तर गरिएको छैन भनी दर्पणलाई बताए।
