सन्त जोसेफ महाविद्यालयमा ओरिएन्टेसन कार्यक्रम

दार्जीलिङ, 1 अगस्त (निसं): दार्जीलिङ सन्त जोसेफ महाविद्यालयमा नयाँ भर्ना भएका विद्यार्थीहरूलाई स्वागत जनाउँदै बुधबार ओरिएन्टेसन कार्यक्रम सम्पन्न गरियो। दीप प्रज्ज्वलनबाट सुरू भएको कार्यक्रममा स्वागत सम्भाषण डिन डा. राधा शर्माले राखेकी थिइन् भने कार्यक्रममा प्राचार्य फादर डोनाटस कुजुरले महाविद्यालयमा पठन-पाठनको महत्त्वबारे अवगत गराउँदै अनुशासित भई राम्रो शिक्षा आर्जन गर्नु नै प्राथमिक धर्म रहेको बताए। यस्तै  कार्यक्रममा प्रशासनिक उप-प्राचार्य डा. रूपेश तिवारीले विद्यार्थीहरूलाई सफल भविष्यको कामना साथै स्वागत जनाएका थिए। यसपछि आकादमीक उपप्राचार्य फादर डा. विनय कान्डुलनाले विद्यार्थीहरूलाई महाविद्यालयका नीति नियमबारे अवगत गराएका थिए। जहाँ उनले महाविद्यालय तथा वर्तमान शिक्षा पद्धितिका नियमसँग अवगत गराउँदै विद्यार्थीहरूको सर्वाङ्गिण विकासमा चाहिने कुरा ज्ञानवर्धक तरिकाले सुनाएका थिए। यसरी नै एनसीसी र एनएसएसका संयोजक दुवै कप्तान डा. धिरज ब्राह्मण र सह प्राध्यापक बलराम सापकोटाले विद्यार्थीहरूलाई एनसीसी र एनएसएस का बारे बताएका थिए।यस कार्यक्रममा नयाँ भर्ना भएका विद्यार्थीहरूलाई ज्ञान, जोश-उत्साह दिने उद्देश्हरूलाई ध्यानमा राखेर आयोजना गरिएको थियो। प्राध्यापिका डा. रजनी देवानद्वारा सञ्चालित कार्यक्रममा प्राध्यापिका पार्वती राईले धन्यवाद ज्ञापन् दिएकी थिइन्। कार्यक्रममा विभिन्न विभागका प्राध्यापक प्राध्यापिका लगायत विद्यार्थीहरू उपस्स्थित रहेका थिए।