सिक्किमका प्रहरी महानिरीक्षक (DGP) अक्षय सचदेवाले राज्यभर एलपीजी सिलिन्डरको कृत्रिम अभाव सिर्जना गर्ने प्रयासविरुद्ध कडा कारबाही गर्न निर्देशन दिएका छन्। उनले सबै जिल्लाका प्रहरी अधीक्षक (SP), उप–विभागीय प्रहरी अधिकृत (SDPO) तथा थाना प्रभारी (SHO) हरूलाई तत्काल कारबाही गर्न आदेश दिएका हुन्।
राज्यका विभिन्न स्थानबाट एलपीजी सिलिन्डर होर्डिङ (भण्डारण गरेर कृत्रिम अभाव सिर्जना गर्ने), बजारमा सिलिन्डर नपाइने अवस्था, बोक्ने मजदुरहरूले अतिरिक्त शुल्क लिने तथा घरेलु एलपीजी सिलिन्डर होटल र रेस्टुरेन्टमा प्रयोग गरिरहेको सम्बन्धमा आएका गुनासोपछि डीजीपीले यस्तो निर्देशन जारी गरेका हुन्। डीजीपी सचदेवाले सिक्किममा वास्तविक रूपमा एलपीजीको कुनै अभाव नभएको स्पष्ट पार्दै केही व्यक्तिहरूले कृत्रिम अभाव सिर्जना गरेर सरकारको छवि बिगार्ने प्रयास गरिरहेको बताए।
प्रहरीलाई क्षेत्रीय निरीक्षण गर्ने, नियमित जाँच अभियान सञ्चालन गर्ने, सिलिन्डरको उचित वितरण सुनिश्चित गर्ने तथा होर्डिङ, अवैध रूपमा आपूर्ति मोड्ने वा अत्यधिक मूल्य असुल्ने व्यक्तिविरुद्ध कानुनी कारबाही गर्न निर्देशन दिइएको छ। यस अभियानको अनुगमन प्रहरीका वरिष्ठ अधिकारीहरू, जसमा डीआईजीहरू तथा प्रहरी महानिरीक्षक (कानुन तथा व्यवस्था) समेत रहेका छन्, उनीहरूले गर्ने जनाइएको छ।
