सिलगढीस्थित बंगाल सफारी पार्कमा नयाँ बाघिनी ल्याइने भएको छ। १ अप्रिलमा प्रकाशित समाचारअनुसार वन विभागले जनावर आदान–प्रदान कार्यक्रमअन्तर्गत दार्जीलिङको पद्मजा नायडू हिमालयन जुलोजिकल पार्कबाट एउटा बाघिनी बंगाल सफारीमा ल्याउने तयारी गरेको हो।समाचारअनुसार यस निर्णयको मुख्य उद्देश्य बाघको प्रजननमा नयाँ रक्तसम्बन्ध ल्याउनु हो। अहिले बंगाल सफारीमा रहेका धेरैजसो बाघ एउटै वंशका भएकाले ‘इनब्रिडिङ’ को जोखिम बढिरहेको बताइएको छ। विशेषज्ञहरूका अनुसार एउटै वंशमा लामो समयसम्म प्रजनन भइरहँदा सन्तानमा रोग प्रतिरोधात्मक क्षमता कम हुने, जन्मजात समस्या देखिन सक्ने तथा मृत्यु दर बढ्न सक्ने जोखिम हुन्छ। यस कार्यक्रमअन्तर्गत बंगाल सफारीबाट पनि एउटा बाघिनी दार्जिलिङस्थित जुलोजिकल पार्कमा पठाइने बताइएको छ। यस प्रस्तावलाई सेन्ट्रल जू अथोरिटीले समेत स्वीकृति दिइसकेको समाचारमा उल्लेख गरिएको छ। अधिकारीहरूका अनुसार यसले दुवै स्थानमा बाघको स्वस्थ प्रजननका लागि सहयोग पुग्ने विश्वास गरिएको छ। समाचारमा उल्लेख भएअनुसार २०१६ मा बंगाल सफारीमा दुईवटा रोयल बंगाल टाइगर ल्याएर सफारीको सुरुआत गरिएको थियो। हाल त्यहाँ १४ वटा रोयल बंगाल टाइगर रहेका छन् र पर्यटकका लागि ‘रॉयल बंगाल टाइगर सफारी’ मुख्य आकर्षण मानिन्छ। बाघको संख्या बढेसँगै नयाँ एनक्लोजर समेत निर्माण गरिएको समाचारमा जनाइएको छ।
