गोर्खा राष्ट्रिय मुक्ति मोर्चामा नयाँ सदस्यहरू जोडिने क्रम निरन्तर जारी रहेको जानकारी पार्टी मिडिया सेल प्रभारी दिनेस साम्पाङले जानकारी दिएका छन्। पछिल्लो समय विशेषगरी युवावर्ग तथा विभिन्न क्षेत्रका वरिष्ठ व्यक्तिहरूको गोरामुमोप्रति आकर्षण बढ्दै गएको बताइएको छ।
सै क्रममा गोरामुमो कालेबुङ ब्लक–३ अन्तर्गत ४३, ४४ र ४५ नम्बर समष्टिबाट उल्लेखनीय संख्यामा युवाहरू पार्टीमा आबद्ध भएका छन्। गोरामुमो अध्यक्ष मन घिसिङ को प्रमुख उपस्थितिमा आयोजित कार्यक्रममा ब्लक–३ संयोजक रितिश भुजेल, केन्द्रीय समिति सदस्य भक्त जैरु तथा शंकमणि राईलगायत नेताहरू उपस्थित रहेका थिए।
कार्यक्रममा अध्यक्ष मन घिसिङले नवप्रवेशी सदस्यहरूलाई खदा लगाएर स्वागत गर्दै शुभकामना व्यक्त गरेका थिए। साथै, पार्टीको संगठनात्मक मजबुती र जनआधारित विस्तारप्रति सबैलाई प्रतिबद्ध भएर लाग्न आग्रह गरेका थिए।
यस अवसरमा ब्लक–३ संयोजक रितिश भुजेलले ४३ र ४४ नम्बर समष्टि सफलतापूर्वक गठन गरिएको जानकारी दिँदै कालेबुङ क्षेत्रमा गोरामुमोको संगठन तीव्र गतिमा विस्तार भइरहेको बताए। उनले नवगठित समष्टिका प्रतिनिधिहरूले आज दार्जीलिङस्थित केन्द्रीय कार्यालयमा अध्यक्ष मन घिसिङसँग भेटघाट गरी संगठन विस्तार, जनसम्पर्क तथा आगामी रणनीतिबारे गहन छलफल गरेको जानकारी पनि दिए।
रितिश भुजेलका अनुसार कालेबुङ क्षेत्रमा गोरामुमोप्रति जनविश्वास दिनप्रतिदिन बढ्दो क्रममा रहेको छ। “गोर्खा राष्ट्रिय मुक्ति मोर्चा गोर्खा जातिको पहिचान र अधिकारको मुद्दा बोकेर अघि बढिरहेको दल हो। जबसम्म जीटीएजस्तो अंसवैधानिक व्यवस्था खारेज भई संवैधानिक व्यवस्था लागू हुँदैन, तबसम्म हाम्रो संघर्ष जारी रहनेछ,” उनले बताए। यसैबीच, केन्द्रीय समिति सदस्य भक्त जैरुको नेतृत्वमा कालेबुङका विभिन्न क्षेत्रबाट आएका वरिष्ठ व्यक्तित्वहरूले पनि पार्टी अध्यक्ष मन घिसिङसँग शिष्टाचार भेटघाट गर्दै बधाई तथा शुभकामना व्यक्त गरेका छन्।
