दार्जीलिङ, 28 दिसम्बर (निस): शनिबार, नेपाली साहित्य सम्मेलन को आयोजनामा प्रत्येक वर्ष सम्पन्न गरिने गिरी जयन्ती नगरपालिका प्रतिमा परिसर सम्पन्न गरियो।
उक्त 98औं गिरी जयन्ती कार्यक्रम नेपाली साहित्य सम्मेलनका अध्यक्ष डा. सीके राईको अध्यक्षता, दार्जीलिङ नगरपालिका अध्यक्ष दिपेन ठकुरीको प्रमुख आतिथ्य, भारप्राप्त सभासद् मुकुन्दराज बराइली, भाषा साहित्यविद् विजयकुमार राई, नेपाली साहित्य सम्मेलनका पूर्व महासचिवद्वय सूर्यकुमार श्रेष्ठ, भक्तराज सुनुवार, कार्यकारिणी सदस्य भरत प्रकाश राई लगायत अन्यको विशिष्ट आतिथ्यमा गरियो।
नेपाली साहित्य सम्मेलनका महासचिव महेन्द्र प्रधानद्वारा सञ्चालन गरिएको यस कार्यक्रमको प्रथम चरणमा उपस्थित अतिथि लगायत विशिष्ट अतिथिहरूको बाहुलीबाट दिप प्रज्वलन साथै श्रद्धाअर्पण गरिएपछि कार्यक्रमको आरम्भ गरियो। उपस्थित भाषा साहित्य प्रेमीहरूको बाहुलीबाट जातीय कवि अगमसिंह गिरीको प्रतिमामा पुष्प गुच्छा श्रद्धार्पण गरेपछि कार्यक्रमलाई सम्बोधनमा राख्दै सर्वप्रथम विजयकुमार राईले आफ्नो सम्बोधनमा नगरपालिका परिसरमा स्थित गिरीको प्रतिमा कसरी स्थापित गरियो भन्ने विषयमाथि प्रकाश पार्दै जातीय कवि अगमसिंह गिरीको प्रतिमा त्यस्ताका तत्कालीन मुख्यमन्त्री नरबहादुर भण्डारीको बाहुलीबाट गरिएको बताउँदै गिरिमाथि आफ्नो वक्तव्य प्रस्तुत गरे।
यसपछि वक्तव्यको क्रममा नेसासका पूर्व महासचिव भक्तराज सुनुवारले गिरीको सालिक स्थापक युग परिबोध परिवारलाई सम्झनामा राख्दै आफ्नो मन्तव्य राखे यसपछि कार्यकारिणी सदस्य भरत प्रकाश राईले गिरीले भाषा साहित्यको निम्ति गर्दै आएको विषयहरूमाथि प्रकाश पारे। विशिष्ट अतिथि नगर पार्षद मुकुन्दराज बराइलीले जातीय कवि अगमसिंह गिरी आफ्नै स्थानमा हुनुको गर्भबोध गर्दै गिरिमाथि आफ्नो संक्षेपमा मन्तव्य प्रकट गरे।
जातीय कवि अगमसिंह गिरीको ९८ औ जन्मजयन्तीलाई सम्बोधनमा राख्दै प्रमुख अतिथि दार्जीलिङ नगरपालि अध्यक्ष दिपेन ठकुरीले कार्यक्रमलाई सम्बोधन गर्दै जातीय कवि अगमसिंह गिरीको जन्मजयन्तीको शुभ उपलक्ष्यमा सम्पूर्ण भाषा साहित्य प्रेमी साथै शुभकामना व्यक्त गर्दै भाषा साहित्यको क्रममा अगमसिंह गिरीको अमूल्य योगदानको विषयबारे आफ्नो मन्तव्य राखे।
कार्यक्रमको अन्तिम चरणमा कार्यक्रमका अध्यक्ष साथै नेपाली साहित्य सम्मेलनका अध्यक्ष डा. सीके राईले उपस्थित सबैप्रति आभार प्रकट गर्दै जातीय कवि अगमसिंह गिरीले दिएका अमूल्य योगदानमाथि आफ्नो अध्यक्ष सम्बोधन राखेपछि अन्त्यमा नेपाली साहित्य सम्मेलनका वर्तमान कार्यकारिणी सदस्य सबिता थापा ‘संकल्प’-द्वारा उपस्थित सबैप्रति धन्यवाद ज्ञापनको कार्यक्रम राखेपछि कार्यक्रमको समापन गरियो।
