अखिल भारतीय महायान बौद्ध म्हाणीपा संघको आयोजनामा ३३औँ सोझ्योङ उपषोध (ङन्युने व्रत) तथा राष्ट्रिय धर्म सम्मेलन मङपू जनमैदानमा भइरहेको छ। कार्यक्रम बौद्ध धर्मगुरु ख्यान रिम्पोछेको अगुवाइमा सञ्चालन भयो। समारोहका प्रमुख अतिथि सिन्कोना बगानका निर्देशक डा. सामुएल राई, धर्मगुरु ख्यान रिम्पोछे तथा रोहित महाराजको बाहुलीबाट राष्ट्रिय झण्डा, पञ्चशील झण्डा र संघको झण्डा उत्तोलन गरिएपछि कार्यक्रमको शुभारम्भ गरिएको थियो।
किरण ब्लोन, रतन लामा, रुपास बम्जन र सुभद्र बम्जनले सञ्चालन गरेको उक्त समारोहमा जीटीए सल्लाहकार अमर लामा तथा सभासद रतन थापा तथा वन विभागका रेञ्जरहरू प्रिय तामाङ र नरेश वाइबा विशिष्ट अतिथिका रूपमा उपस्थित थिए।
३३औँ सोझ्योङ उपषोध (ङन्युने) तथा राष्ट्रिय धर्म सम्मेलन मङपूमा आयोजना गर्नुको उद्देश्यबारे संघका महासचिव एवं धर्मगुरु साङ्गे छोपेलले आफ्नो मन्तव्य राखे।
कार्यक्रमका क्रममा एनएचपीसी चरण–३ का मुख्य अभियन्ता मनोजकुमार सिंह, सिन्कोना बगानका व्यवस्थापक गोपाल लामिछाने, सभासद रतन थापा, हिमालय दर्पणका सम्पादक शिबु छेत्री, तथा अन्य साहित्यकारहरूको बाहुलीबाट “करुणा” शीर्षकको पुस्तक विमोचन गरियो। उक्त पुस्तकबारे किरण पाख्रीनले संक्षिप्त रूपमा प्रकाश पारे।
गत२९ जनवरीदेखि सुरु भएको धार्मिक कार्यक्रम तथा ३३औँ सोझ्योङ उपषोध एवं राष्ट्रिय धर्म सम्मेलन आगामी १ फेब्रुअरी २०२६ मा सम्पन्न हुनेछ। समापनका दिन प्रमुख धर्मगुरु ख्यान रिम्पोछेको बाहुलीबाट अभिषेक (वाङ) वितरण गरिने कार्यक्रम रहेको छ।
यसैक्रममा आज शुक्रबार बिहानदेखि धर्मगुरु ख्यान रिम्पोछेको मार्गदर्शनमा सयौँ भक्तजनहरूले उपवास (ङन्युने व्रत) मा सहभागी भए। व्रतमा सहभागी हुन आज नै हजारौँ उपासक–उपासिकाहरू मङपू जनमैदानस्थित पूजा पण्डाल परिसरमा उपस्थित भएका छन्।
