Siliguri मा राष्ट्रिय डेंगु दिवसको अवसरमा डेंगु रोगप्रति सर्वसाधारणलाई सचेत गराउने उद्देश्यले एक जनचेतनामूलक र्याली आयोजना गरिएको छ। फराबारी महादेव स्पोर्टिङ क्लब तथा एक स्वयंसेवी संस्थाको संयुक्त आयोजनामा सम्पन्न उक्त कार्यक्रममा विद्यार्थी, युवा, सामाजिक कार्यकर्ता तथा स्थानीय बासिन्दाहरूको उल्लेखनीय सहभागिता रहेको थियो।र्याली सिलीगुडीका विभिन्न मुख्य सडक तथा बस्ती क्षेत्र हुँदै निकालिएको थियो। सहभागीहरूले हातमा सचेतनामूलक प्लेकार्ड बोकेर डेंगुबाट बच्न आवश्यक सावधानी अपनाउन सर्वसाधारणलाई आग्रह गरेका थिए। घर वरिपरि पानी जम्न नदिनु, नियमित सरसफाइ गर्नु, फोहोर व्यवस्थापनमा ध्यान दिनु तथा लामखुट्टेबाट जोगिन मच्छरदानी र रिपेलेन्ट प्रयोग गर्नुपर्ने सन्देश र्यालीमार्फत दिइएको थियो। आयोजकहरूले मनसुनको समयमा डेंगुको जोखिम बढ्ने भएकाले समयमै जनचेतना फैलाउनु अत्यन्त आवश्यक रहेको बताएका छन्। उनीहरूका अनुसार डेंगु नियन्त्रणका लागि सरकारी प्रयाससँगै नागरिकस्तरबाट पनि सक्रिय सहभागिता आवश्यक छ। स्थानीय बासिन्दाहरूले यस्ता कार्यक्रमले समाजमा सकारात्मक सन्देश फैलाउने भन्दै नियमित रूपमा यस्ता जनचेतनामूलक अभियान सञ्चालन गरिनुपर्ने बताएका छन्।
