भारतको गुजरात राज्य अन्तर्गत सुरतमा दुई जना कलेज छात्राको मृत्यु भएपछि कृत्रिम बुद्धिमत्ता प्रयोगबारे नयाँ बहस सुरु भएको छ। पुलीसका अनुसार १८ देखि २० वर्ष उमेरका दुई छात्रा स्थानीय मन्दिरको शौचालयभित्र मृत अवस्थामा फेला परेका हुन्।
घटनाअनुसार बिहान दुवै छात्रा कलेज जाने भन्दै घरबाट निस्किएका थिए। तर दिउँसोसम्म घर नफर्किएपछि चिन्तित परिवारले पुलीसलाई जानकारी गराएका थिए। त्यसपछि पुलीसले मोबाइल फोनको लोकेशन ट्र्याक गर्दा उनीहरू स्वामीनारायण मन्दिर वरपर रहेको पत्ता लागेको थियो। मन्दिर परिसरबाहिर पीडितमध्ये एक जनाको स्कुटरसमेत पार्क गरिएको अवस्थामा फेला परेको थियो।
पुलीस टोली घटनास्थल पुगेपछि मन्दिरको शौचालयभित्र दुवै छात्रा मृत अवस्थामा फेला परेका थिए। प्रारम्भिक अनुसन्धानमा उनीहरूले आत्महत्यासम्बन्धी जानकारी खोज्न ChatGPT प्रयोग गरेको आशंका गरिएको बताइएको छ। यद्यपि घटनाको वास्तविक कारणबारे थप अनुसन्धान भइरहेको पुलीसले जनाएको छ।
यस घटनापछि कृत्रिम बुद्धिमत्ता प्रयोगको सुरक्षा तथा नैतिक मापदण्डबारे अन्तर्राष्ट्रिय स्तरमै बहस सुरु भएको छ। टेक उद्योगका चर्चित उद्यमी एलन मस्कले समेत यस विषयमा प्रतिक्रिया दिँदै कृत्रिम बुद्धिमत्ता प्रयोगमा कडा सुरक्षा व्यवस्था आवश्यक रहेको बताएका छन्।
हाल पुलीसले घटनासम्बन्धी थप तथ्य संकलन गर्दै मृत्युको वास्तविक कारण पत्ता लगाउने प्रयास गरिरहेको जनाएको छ। साथै मानसिक स्वास्थ्य र डिजिटल प्लेटफर्म प्रयोगसम्बन्धी सावधानीबारे पनि व्यापक छलफल सुरु भएको छ।
