दार्जीलिङ लोकसभाका सांसद एवं भारतीय जनता पार्टीका राष्ट्रीय प्रवक्ता, राजु बिष्टले आइतबार कालेबुङमा खस भारतीय हितकारी सम्मेलनको १०औँ केन्द्रीय महा-अधिवेशनमा उपस्थित भएर बधाई अनि शुभकामना व्यक्त गरेका थिए। हाम्रो गोर्खा जाति बहुभाषी, बहुसंस्कृति, बहुधर्मी जनजाति एवम् समुदायहरूले मिलेर बनेको एउटा साझा फूलबारी हो भन्ने तथ्यमाथि विशेष जोड़ दिएका थिए। यस फुलबारीमा रहेका सबै फुलहरूको आ-आफ्नै विशिष्ट अस्तित्व, रूप-रङ अनि सुवासनाहरूले एक सुन्दर बगैँचाको निर्माण भएको छ। यस पृष्ठभूमिमा, भारतभरि छरिएर बसेका गोर्खा जातिको अस्तित्व अनि संवर्द्धनमा खसहरूको योगदान उल्लेखनीय र गरिमामय रहेको छ। खस भारतीय हितकारी सम्मेलनले भारतभरि छरिएर बसेका खसहरू र गोर्खाहरूलाई भावनात्मक एकताको सूत्रले बाँध्ने महत्त्वपूर्ण काम गरिरहेको छ।
समग्रतामा हामी गोर्खाहरूको सामुहिक अस्तित्व यसका विभिन्न घटकहरूको समानान्तर विकास अनि समृद्धिमाथि निर्भर गर्दछ। हामी सबै घटक जातिहरू एउटै धुरीमुनि बाँचिरहेका छौँ, त्यसैले यसलाई बलियो र सुदृढ़ बनाएर नै हाम्रो गोर्खा जातिको अस्तित्व अनि हाम्रो चिनारी बाँच्न सक्नेछ। खसहरूको संस्कृति अनि इतिहासलाई भावी पिंढ़ीसम्म पुऱ्याउन अनि यसको विकास र संवर्द्धनका लागि स्वच्छ अनि व्यापक दृष्टिकोण राखेर गठित एवम् निरन्तर जाति, समाज, देश र मानवमात्रको हितमा अगाड़ि बढ़ीरहेको यस संस्थाका उद्देश्यहरू फलिभूत होउन् भन्ने कामना सांसद राजु बिष्टले गरेका थिए।
