विधायक निरज जिम्बाद्वारा स्ट्रीट लाइट जडान कार्यमा तीब्रता

दार्जीलिङका विधायक निरज तामाङ जिम्बाले आफ्नो विधान सभा क्षेत्रीय ग्रामीण विकास कोषअन्तर्गत समाजिक उपयोगिता र जनसुरक्षालाई लक्षित गरी प्रदान गरिएको सौर्य पथ–ज्योति (सोलार लाइट) को स्थापना कार्य तीव्रगतिमा अघि बढिरहेको छ। यस विकास योजनाअन्तर्गत पुल–बिजनबारी खण्ड विकास कार्यालयमार्फत ऋषिहाट चियाबारी क्षेत्रमा रहेका कुल सातवटा समाजलाई दुई–दुईवटा गरि जम्मा १४ वटा सौर्य पथ–ज्योति यन्त्र उपलब्ध गराइएको छ। स्थानीय जनघनत्व भएको क्षेत्र तथा सार्वजनिक आवागमनका संवेदनशील मोड–घुम्ती, चौबाटो, झोडानाला, चर्च, मन्दिर, विद्यालय तथा एकान्त वन–क्षेत्रहरूमा यी पथ–ज्योति स्थापना गरिनु समुदायका लागि सुरक्षा र सहजताको महत्वपूर्ण कदमका रूपमा लिइएको छ।
समाजसेवी बिरमन लामाले यस योगदानलाई ‘गोर्खा समाजको हितमा गरिएको अत्यन्त सार्थक र समयानुकूल पहल’ भन्दै विधायक निरज जिम्बा प्रति सम्पूर्ण समाजको तर्फबाट हार्दिक धन्यवाद ज्ञापन गरेका छन्।