मिथुन खरसाङ नआउने

खरसाङ, (निसं): खरसाङमा भारतीय जनता पार्टीको जनसभा अनि बलिवुड अभिनेता तथा भारतीय जनता पार्टीको शीर्ष नेता मिथुन चक्रवर्तीको कार्यक्रम रद्द गरिएको छ। यस विषयमा आज खरसाङ्मा पत्रकार सम्मेलन गरेर भारतीय जनता पार्टीको तर्फबाट उक्त जानकारी गराइएको छ। यस विषयमा पत्रकारहरुसित कुराकानी गर्दै भारतीय जनता पार्टीको दार्जीलिङ जिल्ला महासचिव सोनाम लामाले भने, खरसाङ्को जनसभा हालका लागि रद्द गरिएको छ। यसको कारण रोजगार (श्रम) मन्त्री मनसुख मांडवियाको सिलगढ़ी आगमन तथा जनवरी महिनादेखि लागु गरिएको नयाँ श्रम संहिताको विषयमा दार्जीलिङ्का नेतृत्वसँग हुन लागेको महत्वपूर्ण बैठक हो। शीघ्रै नै खरसाङ्मा ठूलो जनसभा आयोजना गर्ने हाम्रो योजना रहेको छ। उक्त पत्रकार सम्मेलनमा भारतीय जनता पार्टीको दार्जीलिङ जिल्ला सचिव विनय प्रसाद र जिल्ला मिडिया प्रभारी चन्दन प्रसाद पनि उपस्थित रहेका थिए।