नोएडामा अशान्तिपछि उत्तर प्रदेशमा मजदुरहरूको न्यूनतम ज्याला वृद्धि

भारतको उत्तर प्रदेश सरकारले नोएडामा देखिएको श्रमिक आन्दोलन र अशान्तिपछि सबै वर्गका कामदारहरुको न्यूनतम ज्याला बढाउने निर्णय गरेको छ। नयाँ ज्याला दर अप्रिल १ बाट लागू हुने गरी घोषणा गरिएको जनाइएको छ।उद्योग क्षेत्रमा काम गर्ने मजदुरहरुले लामो समयदेखि ज्याला वृद्धि, ओभरटाइमको उचित भुक्तानी र काम गर्ने अवस्था सुधारको माग गर्दै आन्दोलन गर्दै आएका थिए। आन्दोलन क्रमशः उग्र बन्दै गएपछि सडकमा झडप, ढुंगामुढा र सवारी साधनमा तोडफोड समेत भएको थियो।
सरकारले यस अवस्थालाई नियन्त्रणमा लिन र श्रमिकहरुको माग सम्बोधन गर्न उच्चस्तरीय समिति गठन गरी नयाँ ज्याला दर तय गरेको जनाएको छ। निर्णय अनुसार असंगठित, अर्धदक्ष तथा दक्ष सबै श्रेणीका कामदारहरुको तलब वृद्धि गरिएको छ। अधिकारीहरुका अनुसार यो निर्णय नियोक्ता र श्रमिक दुवै पक्षसँग परामर्श गरेर गरिएको हो, जसले उद्योग क्षेत्रमा देखिएको तनाव कम गर्न सहयोग पुर्याउने अपेक्षा गरिएको छ।