पश्चिम बंगालकी मुख्यमन्त्री तथा तृणमूल कांग्रेसकी प्रमुख ममता ब्यानर्जीले आगामी २०२६ विधानसभा चुनावलाई लक्षित गर्दै उत्तर बंगालका विभिन्न विधानसभा क्षेत्रमा ताबडतोड चुनावी अभियान सञ्चालन गरेकी छन्। बुधबार उनले एकै दिनमा धेरै महत्वपूर्ण क्षेत्रमा जनसभा गर्दै चुनावी माहोललाई झन् तातेको बनाएकी हुन्। समाचारअनुसार ममता बनर्जीले आफ्नो चुनावी कार्यक्रम मयनागुडीबाट सुरु गरेकी थिइन्, जहाँ उनले ठूलो जनसभालाई सम्बोधन गर्दै राज्य सरकारले गरेको विकास कार्यबारे चर्चा गरिन्। त्यसपछि उनी हेलिकप्टरमार्फत डाबग्राम–फुलबारी विधानसभा क्षेत्रको जब्राविटा पुगेकी थिइन्, जहाँ उनले तृणमूल कांग्रेसका उम्मेदवार रणजन सिल शर्माको पक्षमा आयोजित सभालाई सम्बोधन गरिन्। उक्त कार्यक्रममा पार्टीका अन्य नेताहरू पनि सहभागी भएका थिए।
यसपछि ममता ब्यानर्जी नक्सलबारी पुगेकी थिइन् र त्यहाँ पनि अर्को ठूलो जनसभालाई सम्बोधन गर्दै तृणमूल कांग्रेसका उम्मेदवार शंकर मलाकरको पक्षमा मत मागेकी थिइन्। एकै दिनमा उत्तर बंगालका महत्वपूर्ण विधानसभा क्षेत्रमा लगातार सभा गर्दै उनले पार्टीको चुनावी अभियानलाई आक्रामक ढंगले अघि बढाएको बताइएको छ। सभाका क्रममा ममता बनर्जीले भारतीय जनता पार्टीमाथि कडा आलोचना गर्दै राज्य सरकारका विभिन्न योजना र विकास कार्यहरूको चर्चा गरिन्। उनले आगामी चुनावलाई निकै महत्वपूर्ण चुनावका रूपमा व्याख्या गर्दै उत्तर बंगालमा पार्टीलाई अझ मजबुत बनाउन कार्यकर्ताहरूलाई सक्रिय हुन आग्रह गरेकी थिइन् राजनीतिक विश्लेषकहरूका अनुसार ममता बनर्जीले उत्तर बंगालमा लगातार जनसभा गर्दै चुनावी अभियान सुरु गर्नुले यस क्षेत्रलाई २०२६ को विधानसभा चुनावका लागि सबैभन्दा निर्णायक क्षेत्रका रूपमा हेरिएको संकेत गर्दछ। एकै दिनमा मयनागुडी, डाबग्राम–फुलबारी र नक्सलबारीजस्ता महत्वपूर्ण क्षेत्रमा कार्यक्रम गरेर उनले चुनावी रणनीतिलाई आक्रामक ढंगले अघि बढाएको स्पष्ट देखिएको छ।
