खरसाङ, (निसं): भारतीय गोर्खा प्रजातान्त्रिक मोर्चा (बीजीपीएम) का महासचिव अमर लामाले तकदाह टिस्टा भ्याली क्षेत्रको चुनावी सभालाई सम्बोधन गर्दै भाजपाको रणनीति र गोर्खा समुदायप्रतिको व्यवहारमाथि कड़ा आलोचना गरेका छन्।
लामाले सभालाई सम्बोधन गर्दै भने, अहिले भाजपाकाहरू विभिन्न राजनैतिक दलहरूसित बसेर बैठक गर्दैछन्। चुनाउ कसरी जित्नु उनीहरूको एजेण्डा होइन। तर कुन कुन पार्टी मिल्यो भने अनित थापालाई हराउनु सकिन्छ। यो उनीहरूको मुख्य एजेण्डा हो। लामाले राज्यकी मुख्यमन्त्री ममता बनर्जी सरकारले दिदी-बहिनीहरूको निम्ति लक्ष्मी भण्डारको भत्तामा 5 सय रुपियाँदेखि बढ़ाएर वार्षिक 18 हजार रुपियाँ पुऱ्याएको, जबकि बीजेपीले भोटका लागि मात्र 3 हजार मासिक भत्ता दिने लालच देखाउँदैछ भनी आरोप लगाउदै भने, राज्य सरकारले भोटअघि नै केही दिँदैछ, तर बीजेपीले अहिले हामीलाई दिनु त होइन, हाम्रो बाउबाजेको कागज माग्दैछ।
बीजेपीलाई साँपको संज्ञा दिँदै लामाले भने, बीजेपीले एसआईआर गराए, अब एनआरसी ल्याउनेछ। दुईपटक भोट जिताएको सांसदले खानेपानीको पैसा रोकेर राखेको छ। मेरो बाउ-बाजेको जन्मपत्र माग्दैछ, त्यो समय कुन अफिसले जन्मपत्र दिन्थ्यो? लामाले एसआईआरको नाममा गोर्खाहरूले भोगेको दुःख बिर्सन नहुने पनि बताए। श्रमिकहरूको न्यूनतम ज्यालाको मुद्दामा पनि सांसद राजु विष्टको दावीलाई गलत बताए। तिनले भने, सांसद राजुले 3 सय 50 रुपियाँ रोज दिन्छु भने, तर केन्द्रको बजेटमा यो उल्लेख छैन। राज्य सरकारले 1 सय 67 बाट 2 सय 50 रुपियाँसम्म अन्तरिम ज्याला बढ़ाएको छ। भारत सरकारको लेबर कोडले 1 सय 78 भन्दा कम हुन नदिन भन्छ, तर बीजेपीको चिया श्रमिक ज्यालामा कुनै नीति छैन। बीजीपीएमले न्यूनतम रोजको मुद्दालाई फत्ते गरी छाड्नेछ।
