खरसाङ, 9 जुलाई (मोहन प्रसाद)ः लायन्स क्लब खरसाङद्वारा विभिन्न सामाजिक कार्यलाई अघि बढ़ाउँदै खरसाङको एउटा टीम दार्जीलिङस्थित जोरबंगलो पुगेर रक्तदान शिविरको आयोजना गरेको छ। खरसाङमा पत्रकारहरूसित बोल्दै, लायन्स क्लब अफ खरसाङका वरिष्ठ प्रतिनिधि साथै सचिव आयुष गुप्ताले जनाए अनुसार, लायन्स क्लब खरसाङले जोरबंगलो ट्राफिक पुलिस अनि लायन्स क्लब दार्जीलिङका सदस्यहरूको सहयोगमा दार्जीलिङ महकुमा अन्तर्गत रहेको जोरबंगलोको टाईगर हिल रोड सार्वजनिक भवनमा एउटा रक्तदान शशिविरको आयोजना गर्यो। यस अवधि रक्तदानको निम्ति क्षेत्रका धेरै मानिसहरू उत्साहित बनेर रक्तदानको निम्ति आएका थिए। उक्त शिविरमा मोठ 44 यूनिट रक्त संग्रह गरिएको सचिव गुप्ताले जनाएका छन्। तिनले थप जनाए अनुसार, संग्रह गरिएको रगत लायन्स तराई ब्लड सेन्टर सिलगढ़ीमा पठाइएको छ। उक्त रक्तदान शिविरको अध्यक्षता नवीन अग्रवालले गरेका थिए भने लायन्स क्लब खरसाङका अध्यक्ष विवेक गोयल, सचिव आयुष गुप्ता संगै जोरबंगला ट्राफिक पुलिसका प्रतिनिधि, दार्जीलिङ लायन्स क्लबका प्रतिनिधिहरूको पनि उक्त कार्यक्रममा विशेष सहभागिता रहेको थियो। गुप्ताले बताए अनुसार, गत केहि महिना अघि पनि लायन्स क्लब खरसाङद्वारा कतिपय संगठनहरूको सहयोगमा रक्तदान शिविरको आयोजना गरिएको थियो भने आउँदो दिनहरूमा पनि क्लबद्वारा जनहितमा अन्य विभिन्न सेवा कार्यहरूलाई अघि बढ़ाइन्दै लगिनेछ।
