खरसाङ, (सुवास छेत्री)ः बाँदरहरूले बढ्दो उपद्रवको कारण अचेल ग्रामीण क्षेत्रका मानिसहरूले आफ्नो बारीमा सागसब्जी तथा अन्य फसलहरू लगाउन छोडेका छन्। आफ्नो घरको कोठेबारी होस्, अथवा सगसब्जी एवम् फसल लगाउने बारी होस्, ती सबै बाँझो राख्न बाध्य छन् धेरजसो कृषकहरू। सागसब्जी रोपेर जब खाने लायकको हुन्छ बाँदरहरू पसेर सबै खाइदिने तथा नोक्सान पुर्य़ाइदिने गरेकोले पनि अचेल मानिसहरू बारीमा फसल लगाउन चाहँदैनन्, जसको कारण बारी बाँझो बन्दै गइरहेछ। अचेल बारीमा सागसब्जी तथा अन्नको सट्टा झारहरू पलाउने गरेको छ। अन्न एवम् सागसब्जी उमारेर यसबाट लाभ प्राप्त गर्नुभन्दा बरू बजारको बासी तथा क्यामिकल एवम् विषाणुयुक्त सागसब्जी नै खानु रुचाउँछन् उनीहरू। दुःख गरेर बारी खनजोत गरी फसल उमारेर खान तथा बेच्न लायकको बनाएपछि बाँदर पसेर सबै सखाप पारिदिने गरेकोले अचेल बारीलाई बाँझै छोडिदिने गरेको औ आफ्नो मेहनत खेरो जाने नदिएको बताउँछन् मानिसहरू। बाँदरको उपद्रवलाई स्थायी रूपमा रोकथाम गर्ने उपाय नप्एपछि उनीहरूले सम्बन्धित विभागसँग गुहार लगाउँदै केवल शहरी क्षेत्रमा मात्र नभएर समय-समयमा ग्रामीण क्षेत्रहरूतिर पनि भ्रमण गरेर यस्ता जङ्गली जनावरहरूको उपद्रवलाई रोक्ने उपायहरू बताइदिने अनुरोध पनि गरेका छन्। तिनीहरू अनुसार बाँदरले तिनीहरूको बारीको फसल मात्र खाइदिने होइन तर मानिसहरूमाथि नै जाइलाग्ने सम्भावना रहेकोले हाल तिनीहरूले आफूलाई अनि आफ्ना नानीहरूलाई असुरक्षित अनुभव गरिरहेको पनि जनाएका छन्।
