लाभा, (निसं):गोर्खाल्याण्ड क्षेत्रीय प्रशासनअन्तर्गत अभियान्त्रिकी विभागले लाभा उच्चतर माध्यमिक विद्यालयको भुइँतला तथा चार तल्ले भवन निर्माण कार्यको विधिवत शिलान्यास सम्पन्न गरेको छ।
शिलान्यास समारोहमा प्रमुख अतिथि जिटीएको मुख्य कार्यपाल अनित थापा रहेका थिए। कार्यक्रममा विशिष्ट अतिथि विधायक रूदेन सादा लेप्चा, उपमुख्य कार्यपाल सञ्चबिर सुब्बा साथै क्षेत्रीय प्रशासकहरूको उपस्थितिमा कार्यक्रम सम्पन्न भयो। समारोह लाभास्थित छोर्तेन परिसरमा आयोजना गरिएको थियो।
विधायक रूदेन सादाले मुख्य कार्यपाल अनित थापाप्रति कृतज्ञता व्यक्त गर्दै भने, आजको शिलान्यास कार्यक्रमले केवल लाभा मात्र होइन, सम्पूर्ण कालेबुङलाई गर्वको अनुभूति गराएको छ। यो भवन निर्माण लाभाको विकास यात्रामा एउटा ठूलो कदम हो, र आगामी दिनमा यस्ता विकासमुखी परियोजनाहरू अझ लाभामा आउनेछन्। अनित थापाको नेतृत्वलाई लाभाले अङ्गालेको कारण यहाँ निरन्तर विकास सम्भव भएको छ।
आज शिलान्यास गरिएको निर्माण योजनाको लागत ५ करोड़ ३ लाख रूपैयाँ रहेको छ। यस अवसरमा विधायक लेप्चाले बाग्राकोटमा निर्माण हुने कार्यको पनि रकम अनुमोदन भईसकेको जानकारी दिएका छन्। लाभा उच्चतर माध्यमिक विद्यालयको ५ करोड ३ लाख रूपियाँको लागतमा निर्माण हुने विद्यालय भवनको विधिवत् शिलान्यास जीटीए प्रमुख कार्यपाल अनित थापा, कालेबुङ विधायक रूदेन लेप्चा अनि क्षेत्रीय सभासद कुमार शर्माको बाहुलीबाट गरिएको छ।
