राजेश चौहानको बगानसँग सम्बन्धित छ वटा ट्रेड युनियनका प्रतिनिधिहरू, क्षेत्रीय सभासद कल्पना प्रधान तथा पञ्चायत प्रतिनिधि मणिराज डुम्जनले हालै श्रम मन्त्री मलय घटकसँग महत्वपूर्ण भेटवार्ता गरेका थिए। उक्त भेटघाट कोलकातामा सम्पन्न भएको हो। बैठक सम्पन्न भएपछि राजेश चौहानले कोलकाताबाट जानकारी दिँदै भेटघाट सौहार्दपूर्ण वातावरणमा सम्पन्न भएको बताए। उनका अनुसार मन्त्री महोदयले यसअघि नै जीटीएका मुख्य कार्यपाल अनित थापाले विषयबारे जानकारी गराइसकेको उल्लेख गरेका थिए।
राजेश चौहानले थप जानकारी दिँदै मन्त्री घटकको सुझावअनुसार एक हप्ताभित्र कोलकातामै मन्त्रीस्तरीय त्रिपक्षीय बैठक आह्वान गरिने बताए। उक्त बैठकमा चिया बगानका मालिक पक्ष, ट्रेड युनियनका प्रतिनिधि तथा सरकार पक्षका प्रतिनिधिहरू उपस्थित रहनेछन्। सोही मन्त्रीस्तरीय बैठकमा चिया बगानको सञ्चालनसम्बन्धी अन्तिम तथा चुडान्त निर्णय सुनाइने मन्त्रीले प्रतिनिधि मण्डललाई अवगत गराएका छन्।
उल्लेखनीय छ कि लङभ्यू चियाबगानको सञ्चालन विगत केही समयदेखि विभिन्न कारणले अस्थिर बन्दै आएको छ। यस अस्थिरताका कारण श्रमिक तथा सम्बन्धित पक्षहरू चिन्तित बनेका छन्। यही समस्याको समाधान खोज्ने उद्देश्यले केही दिनअघि बगान सञ्चालनसँग सम्बन्धित छ वटा ट्रेड युनियनका प्रतिनिधिहरूले जीटीएका मुख्य कार्यपाल अनित थापासँग भेटघाट गरेका थिए।
त्यस अवसरमा अनित थापाले जीटीए सभाका डेपुटी चेयरम्यान राजेश चौहानको नेतृत्वमा प्रतिनिधि मण्डल गठन गरी कोलकाता गई श्रम मन्त्रीसँग प्रत्यक्ष भेटेर विषय उठान गर्न निर्देशन दिएका थिए। सोही निर्देशनअनुसार प्रतिनिधि मण्डल कोलकाता पुगेको र श्रम मन्त्रीसँग विस्तृत छलफल सम्पन्न भएको हो।
अब प्रस्तावित मन्त्रीस्तरीय त्रिपक्षीय बैठकबाट लङभ्यू चियाबगानको सञ्चालनबारे स्पष्ट निर्णय आउने अपेक्षा गरिएको छ। श्रमिक, मालिक तथा सरकार पक्षबीच हुने उक्त बैठकलाई समस्याको स्थायी समाधानतर्फको महत्वपूर्ण कदमका रूपमा हेरिएको छ।
