कोहली र ट्राभिसबीच विवाद, हारपछि हात नमिलाएको भिडियो भाइरल

इन्डियन प्रिमियर लिग (आईपीएल) २०२६ अन्तर्गत रोयल च्यालेन्जर्स बेङ्गलुरु र सनराइजर्स हैदराबादबीच भएको खेलपछि विराट कोहली र ट्राभिस हेडबीच देखिएको व्यवहार अहिले सामाजिक सञ्जालमा चर्चाको विषय बनेको छ।हैदराबादविरुद्ध बेङ्गलुरुले ठूलो हार बेहोरेपछि खेल सकिएलगत्तै हुने परम्परागत हात मिलाउने क्रममा विराट कोहलीले ट्राभिस हेडसँग हात नमिलाएको भिडियो भाइरल बनेको हो। खेलभर दुवै खेलाडीबीच मैदानमै भनाभन र तनावपूर्ण अवस्था देखिएको बताइएको छ। रिपोर्टअनुसार, बेङ्गलुरुले २५६ रनको विशाल लक्ष्य पछ्याउने क्रममा विराट कोहली र ट्राभिस हेडबीच केही समय चर्काचर्की भएको थियो। त्यसपछि खेल समाप्तिपछि हात मिलाउने लाइनमा कोहलीले हेडतर्फ नहेरी अघि बढेको दृश्य क्यामेरामा कैद भएको थियो। यस घटनापछि क्रिकेट समर्थकहरूबीच मिश्रित प्रतिक्रिया देखिएको छ। केहीले यसलाई खेलको प्रतिस्पर्धात्मक भावनासँग जोडेर हेरेका छन् भने धेरैले खेल भावना विपरीत भएको टिप्पणी गरेका छन्। उक्त भिडियो अहिले विभिन्न सामाजिक सञ्जाल प्लेटफर्ममा तीव्र रूपमा शेयर भइरहेको छ।