सोनादो, (निसं):सोनादाको पेट्रोल पम्पदेखि भालुटार, मिलिङ बस्ती हुँदै नाली चउर निस्कने रोडमा पर्ने खोङ खोलामा पुल निर्माणको कार्य शुरु भएको छ। उक्त पुल गत 4 अक्टोबरको राती आएको अविरल वर्षाको कारण क्षतिग्रस्त भएको थियो।
उक्त खोङ खोलामा रहेको पुल भत्केपछि रोड पनि क्षतिग्रस्त भएको थियो। यस पुल भत्किएपछि रंगमुक, सिडर्स, मिलिङ बस्ती, नाली चउर क्षेत्रका जनसाधारणलाई धेरै असुविधा भईरहेको थियो। किनभने यो रोड यस क्षेत्रको जनसाधारणको लागि वैकल्पिक मार्गको रूपमा रहेको थियो। तर 4 अक्टोबर राति आएको अविरल वर्षाका कारण क्षतिग्रस्त भएपछि यो रोड बन्द अवस्थामा रहेको थियो।
यस वैकल्पिक मार्गको बन्दावस्थाले स्थानीयहरु र विद्यार्थीहरुलाई धेरै असुविधा भईरहेको थियो भने यस क्षेत्रको धेरैवटा गाउँहरुलाई सोनादासित जोड्न सकिरहेको थिएन। उक्त क्षतिग्रस्त पुलको निरीक्षण गर्नलाई गोर्खाल्याण्ड क्षेत्रीय प्रशासनको प्रमुख कार्यपाल अनित थापा गत 5 नोभेम्बर 2025 मा पुगेका थिए।
उक्त निरीक्षणको समयमा उनले यस क्षतिग्रस्त पुल पुनः निर्माण गरिदिने वचन दिएका थिए। उनको उक्त वचन अनुसार नै खोङ खोलामा रहेको क्षतिग्रस्त पुल निर्माणको कार्य अहिले शुरु भएको छ। यस पुलको निर्माण कार्य शुरु भएपछि स्थानीयहरुले खुशी व्यक्त गरेका छन् किनभने यस पुलको निर्माणले सोनादासित मिलिङ बस्ती, नाली चउर, रंगमुक, सिडर्स क्षेत्रलाई वैकल्पिक रुपमा सजिलैसित जोड्ने काम गर्नेछ।
यस पुलको निर्माण कार्य चाढै र गुणस्तरीय रुपमा हुने कुरामा स्थानीयहरु आशावादी रहेका छन्।
