इरानले फारसको खाडी क्षेत्रमा दुई वटा तेल बोकेको जहाजमा आक्रमण गरेको खबर सार्वजनिक भएको छ। उक्त आक्रमणमा कम्तीमा एक जनाको मृत्यु भएको छ भने अन्य धेरै चालकदलका सदस्यहरूलाई सुरक्षित रूपमा उद्धार गरिएको बताइएको छ।
रिपोर्टका अनुसार अमेरिकाको स्वामित्वमा रहेको कच्चा तेल बोकेको ट्यांकर सेफसी विष्णु इराकको बसरा नजिकको समुद्री क्षेत्रमा आक्रमणको लक्ष्य बनेको थियो। उक्त जहाज मार्शल टापुको झण्डा अन्तर्गत सञ्चालनमा रहेको थियो। आक्रमणका क्रममा जहाजमा रहेका एक भारतीय चालकदल सदस्यको मृत्यु भएको पुष्टि भएको छ।
भारतीय दूतावासले दिएको जानकारी अनुसार जहाजमा रहेका अन्य १५ भारतीय चालकदल सदस्यलाई सुरक्षित रूपमा उद्धार गरी सुरक्षित स्थानमा सारिएको छ। दूतावासले इराकका सम्बन्धित अधिकारीहरूसँग निरन्तर सम्पर्कमा रही उद्धार गरिएका नाविकहरूको अवस्थाबारे निगरानी गरिरहेको जनाएको छ।
उक्त घटनामा अर्को तेल ट्यांकर जेफिरोस पनि आक्रमणमा परेको बताइएको छ। दुवै जहाजमा विस्फोट भएपछि आगलागी भएको थियो। प्रारम्भिक रिपोर्ट अनुसार इरानले पानीमुनि सञ्चालन हुने ड्रोन, अन्डर वाटर ड्रोन वा विस्फोटकले भरिएको डुंगाको प्रयोग गरी आक्रमण गरेको दाबी गरिएको छ।
घटना फारसको खाडी क्षेत्रको इराकी समुद्री सीमाभित्र भएको बताइएको छ। यस क्षेत्र विश्वका सबैभन्दा महत्वपूर्ण ऊर्जा आपूर्ति मार्गहरूमध्ये एक मानिन्छ। यहाँबाट ठूलो परिमाणमा कच्चा तेल विश्वका विभिन्न देशमा निर्यात हुने गर्दछ।
विश्लेषकहरूका अनुसार अमेरिका, इजरायल र इरानबीच जारी तनावका कारण खाडी क्षेत्रमा सुरक्षा अवस्था झनै जटिल बन्दै गएको छ। पछिल्ला दिनहरूमा फारसको खाडी तथा होर्मुज जलडमरूमध्य नजिक व्यापारी जहाजहरूमा आक्रमण हुने घटनाहरू बढ्दै गएका छन्, जसले विश्वव्यापी ऊर्जा आपूर्ति र अन्तर्राष्ट्रिय व्यापारमा असर पार्ने चिन्ता बढाएको छ।
यस घटनापछि विभिन्न देशहरूले समुद्री व्यापारिक मार्गको सुरक्षाबारे गम्भीर चासो व्यक्त गरेका छन्। खाडी क्षेत्रमा बढ्दो तनावका कारण तेलको मूल्य तथा विश्व ऊर्जा बजारमा समेत प्रभाव पर्ने सम्भावना रहेको अन्तर्राष्ट्रिय विश्लेषकहरूले बताएका छन्।
