गत अक्टोबर महिनामा परेको अविरल वर्षाको कारण सुके समष्टि अन्तर्गत पर्ने राङ्गभाङ्ग जौबारी क्षेत्रमा ठूलो मात्रामा क्षति पुगेको थियो। उक्त क्षेत्रलाई जोड्ने दुई वटा बाटोमध्ये एक मार्गमा गम्भीर क्षति पुगेको छ भने सोही क्षेत्रमा रहेको पुलको अवस्थासमेत कमजोर देखिएको छ। यही कारण स्थानीय वासिन्दाहरूले इन्डियन गोर्खा जनशक्ति फ्रन्टका प्रमुख अजय एडवर्डससमक्ष पुल मर्मतका लागि औपचारिक निवेदन पेश गरेका थिए। उक्त निवेदनका आधारमा आज समष्टि सभापति दिनेश राई, सचिव दावा शेर्पा तथा अगुवाइ सदस्य बिनोद राईको नेतृत्वमा पुलको स्थलगत निरीक्षण गरिएको छ। निरीक्षणपछि आइजीजेएफ प्रमुखज्यूको प्रतिवद्धता अनुसार छिट्टै नै पुल तथा बाटो मर्मतसम्बन्धी समस्याको समाधान गरिने निर्णय गरिएको छ। यसैबीच, सुके समष्टि अन्तर्गत पर्ने दस माइल ग्रुप फरेस्ट क्षेत्रमा गाउँबासीहरूले राखेको बीच सडक निर्माण सम्बन्धी निमन्त्रणाको आधारमा समष्टि सभापति दिनेश राई, सचिव दावा शेर्पा तथा अगुवाइ सदस्य बिनोद तामाङले इन्जिनियर सुरज छेत्रीसहित स्थल भ्रमण गरेका छन्। इन्जिनियर छेत्रीको नेतृत्वमा सम्पूर्ण क्षेत्रको विस्तृत प्राविधिक अध्ययन गरी आवश्यक कार्ययोजना तयार गरिने भएको छ। त्यसैगरी, सुके समष्टि चट्टाई धुरा क्षेत्रमा अवस्थित समाज भवनको मर्मत तथा नयाँ भान्सा घर निर्माणका लागि इन्जिनियर सुरज छेत्रीको प्राविधिक निगरानीमा भवनको नापजाँच कार्य सम्पन्न गरिएको छ।
यस्तै, सुके समष्टि अन्तर्गत पुलुङ्दुङ्ग गैरी गाउँमा रहेको मन्दिर परिसरमा फेन्सिङ निर्माण तथा कार्यक्रमका लागि प्रयोग हुने सानो भवन निर्माणसम्बन्धी विषयमा पनि समष्टि सभापति दिनेश राई, सचिव दावा शेर्पा, अगुवाइ सदस्य बिनोद तामाङ तथा स्थानीय बासिन्दाहरूको उपस्थितिमा प्रस्ताव तथा योजना सम्बन्धी छलफल गरी आवश्यक विवरण संकलन गरिएको छ।
सुके समष्टिले माथि उल्लेखित सबै कामहरूलाई प्राथमिकताका साथ अघि बढाउँदै स्थानीय बासिन्दाहरूको सुरक्षालाई मुख्य उद्देश्यका रुपमा लिन प्रतिबद्धता लिएको छ।
