खरसाङ, (निसं): खरसाङमा भारतीय सेना दिवस श्रद्धा, सम्मान र गौरवको साथ मनाइयो। भारतीय भूतपूर्व सैनिक सङ्गठन खरसाङ शाखाको आयोजनामा नगरपालिका कार्यालय मुनि रहेको सङ्गठनको कार्यालयमा सेना दिवस मनाइएको हो। कार्यक्रममा सङ्गठनका उपाध्यक्ष क्यापटन विमल प्रधानको बाहुलीबाट राष्ट्रिय झण्डोत्तलन गरिएको थियो। झण्डोत्तलनपछि सङ्गठनका सचिव पुरण थापाको साथमा उपस्थित रहेका सङ्गठनका कार्यकारिणी समिति सदस्यहरूले श्रद्धापूर्वक राष्ट्रिय गीत गाएका थिए।
कार्यक्रममा वक्तव्य राख्दै सङ्गठनका खरसाङ शाखा सचिव पुरण थापाले आजकै दिन सन् 1949 मा भारतीय सेनाको नेतृत्व पहिलो पटक भारतीय सेनाध्यक्षलाई सुम्पिएको ऐतिहासिक घटनाको सम्झनामा प्रत्येक वर्ष 15 जनवरीलाई सेना दिवसको रूपमा मनाइन्छ भनी जनाए। तिनले यस दिनले भारतीय सेनाको शौर्य, अनुशासन, बलिदान र देशप्रतिको निष्ठालाई स्मरण गराउँछ। देशको सीमाको रक्षा होस् वा प्राकृतिक विपद्का कठिन घड़ीमा अथवा खेलको क्षेत्रमा भारतीय सेनाले अतुलनीय र प्रशंसनीय भूमिका खेलेको छ। राष्ट्रको सार्वभौमिकता र जनताको सुरक्षाका लागि जीवन उत्सर्ग गर्ने वीर शहीदहरूको बलिदान सधैं स्मरणीय रहनेछ। यस गौरवमय अवसरमा भारतीय भूतपूर्व सैनिक सङ्गठन (इण्डियन एक्स सर्विसमेन लीग) ले सम्पूर्ण वीर सहिदहरूलाई भावपूर्ण श्रद्धाञ्जली अर्पण गर्दै सेवा गरिरहेका सैनिक तथा सम्पूर्ण पूर्व सैनिकहरुप्रति हार्दिक सम्मान र कृतज्ञता व्यक्त गर्दछ भनी आफ्नो वक्तव्यमा भने।
कार्यक्रममा भारतीय भूतपूर्व सैनिक सङ्गठन खरसाङ शाखाका कार्यकारिणी सदस्यहरूको साथमा साधरण सदस्यहरूको पनि उपस्थिति रहेको थियो।
