दार्जीलिङ, 10 अगस्त(निसं): भारतीय नागरिकहरूको परिचयहरूको प्रमाण पत्रहरूमा विशेष महत्व बोकेको आधार कार्ड मशिन अचल भएकोले घुम-जोरबङ्लो क्षेत्रबासी साथै वरिपरिका जनसाधारणलाई आधार कार्ड नयाँ बनाउन, आधारित कार्ड संशोधन गर्न साथै आधर कार्ड सम्बन्धी अन्य कार्यहरू गर्न असुविधा पुगेको गुनासो लिएर घुम क्षेत्रको सामाजिक संस्थान सङ्घर्ष एवं विकास समिति घुमले बिहिबार दार्जीलिङ हेड पोस्ट अफिस सुप्रिनटेन्डेन्ट-सित भेट गर्दै घुम डाक घरमा राखिएको आधार कार्ड मशिनलाई पुन सञ्चालनमा ल्याउने अनुरोध गरेको छ।गत 2022 सालमा सङ्घर्ष एवं विकास समिति घूमको सक्रियतामा स्थापना गरिएको यस आधार कार्ड मशिन हाल अचल रहेकोले जनसाधारणलाई धेरै असुविधा भएको दार्जीलिङ हेड पोस्ट अफिस सुप्रिनटेन्डेन्टलाई अवगत गराउदै एक ज्ञापन-पत्र पनि चढाएको समितिका अध्यक्ष पूर्व छिरिङ डुक्पा सचिव अरुण कुमार छेत्री अनि सल्लाहकार सीबी क्षेत्रीले जानकारी गराएका छन् । उनीहरूको जानकारी अनुसार गत तीन महिनादेखि घुम डाक घरमा राखिएको आधार कार्ड मशिन अचल छ, यस प्रकारको जानकारी हेड पोस्ट अफिस सुप्रिनटेन्डेन्टलाई दिएपछि सुप्रिनटेन्डनले अचल रहेको आधार कार्ड मशिनलाई चाँडै सञ्चालनको रुपमा ल्याउने आश्वासन दिएको पनि समितिले बताएको छ।
