सिटोङ कुलैनबगान अन्तर्गत शेल्पु थामडाँडा लघु चिया उत्पादक समितिको अथक प्रयासमा चियापत्तिको कारखाना उद्घाटन भएको छ। उक्त ऐतिहासिक अवसरमा घुम्ती चियबगानका भुतपुर्व जेनरल म्यानेजर बैकुण्ठनाथ मुदगल प्रमुख अतिथि रहेका थिए भने गिद्ध पहाड चियाबगानका मालिक सुधांशु साहु अनि सोलिडेरी ड्याडका कन्सल्टेन्ट उत्तरकुमार राई विशिष्ट अतिथिको रुपमा उपस्थित रहेका थिए। नवनिर्मित उक्त चिया परिशोधन केन्द्रमा सर्वप्रथम पण्डित तारानाथ शर्माले विधिवत रुपमा वास्तु पुजादि गरेपछि प्रमुख अतिथि मुदगल साहेबले रिबन काटेर फ्याक्ट्रीको उदघाटन गरेका थिए।
उदघाटनपछि प्रमुख अतिथि मुदगलले सम्बोधन गर्दै सिटोङ थामडाँडामा २० वर्षअघि एकदुई जनाले शुरु गरेको चियाखेतीले अहिले आएर धेरै अघि बढेको बताए। शुरुआतमा यहावाट ५ केजी काँचो चियापत्ति महलदिराम फैक्ट्रीमा लेबरले बोकेर पुर्याएको कुरा उल्लेख गर्दै वर्तमान यहीं नै फैक्ट्री बनिएको सुखद क्षणले आफु गर्वित भएको बताए। धैर्यताको फल मिठो हुन्छ उन्नति विस्तारै हुँदै जान्छ हतार गर्नुहुदैन यो भनेको दिर्घमियादी उद्योग हो हठात सबै कुरा सम्भव छैन भन्दै भविष्यमा यो फैक्ट्रीले धेरै तरक्की गर्नेछ भनी बताए। यसैगरी विशिष्ट अतिथि सुधांशु साहु अनि उत्तरकुमार राईले चियापत्तिको गुणस्तर बजार व्यवस्थापन फैक्ट्री सञ्चालन अनि यसको उत्पादन क्षमता विस्तार आदि वारेमा उत्कृष्ट जानकारी साझा गरेका थिए। एवंप्रकारले सिटोङ -२ मामरिङका चिया कृषक स्कुल खवास सिटोङ -१ जैविक लघु चिया उत्पादक सोसाइटीका सभापति बिकास बान्तवा अनि शेल्पु थामडाँडा लघु चिया उत्पादक समितिको पक्षवाट नरबहादुर गुरुङले चियापत्तिको खेती सन्दर्भमा अनुभव सुझाव राखेका थिए। यही क्रममा टि टेक्निसियन कुशल राईले फैक्ट्रीमा कस्तो क्वालिटीको पत्तीवाट कस्तो चियापति बनिन्छ भन्ने कृषकवर्गलाई जानकारी गराएका थिए।
वर्तमान यहाँ फैक्ट्री चालू हुनथालेपछि दिनमा ५०/६० केजीसम्म चियापति प्रोसेसिङ्ग गरेर उत्पादन हुनसक्ने क्षमताको घानी साथै डायर (सुकाउने मशीन) यहाँ जडान गरिएको छ, जो विस्तारै बढोत्तरी गर्दै लैजाने जानकारी अघ्यक्ष तेनछिरिङ्ग लेप्चाले जनाए। यसरी यसक्षेत्रका जागरुक कृषकहरुले आफनै जग्गाजमिनमा आफु साथै क्षेत्रका मानिसहरुलाई पनि स्वालम्बी बनाउने दिर्घमियादी चिया उद्योगलाई अप्नाउँदै निजी क्षेत्रमा निजी प्रयासमा चियापत्ति फैक्ट्री निर्माण गरेर सिटोङ क्षेत्रमा एउटा इतिहास रचेका छन्।
