आइजीजेएफद्वारा भविष्यनिधि आयुक्तलाई ज्ञापन पत्र

इण्डियन गोर्खा जनशक्ति फ्रण्टका ट्रेड युनियन- हाम्रो हिल तराई डुवर्स चियाबारी श्रमिक संघले (HTTDCSS) चिया श्रमिकवर्गको पीएफ (PF) को मुद्दा लिएर भविष्यनिधि आयुक्त क्षेत्रीय कार्यालय बिहीबार सिलगढीमा ज्ञापन पत्र चढायो। चिया बगान मजदुरहरुको PF कटौतीमा अनियमितता, समस्या र मालिकहरूको धाँधली विरुद्ध आईजीजेएफका भातृ संगठन, हाम्रो हिल तराई डुवर्स चियाबारी श्रमिक संघले कडा आपत्ति जनाउँदै चाँडो भन्दा चाँडो यस विषयमा कानुनी कारवाही हुनु पर्ने मांग साथै यस गम्भीर समस्याको झट्टै समाधान हुन पर्ने माग उठायो। प्रोभिडेन्ट फण्ड एक्ट 1954 को नियमवालीहरुलाई उल्लंघन गर्दै श्रमिकहरुको खाताबाट कटौती गरे तापनि धेरै कम्पनीहरुले हजारौंको संख्यामा EPFO खातामा कुनै प्रकारको राशी जम्मा नगरेको तथ्यहरु बारम्बार सार्वजनिक भए तापनि यसको समाधान भएको छैन। हाम्रो चियाबारी श्रमिकहरूमाथि ठूलो शोषण भइरहेको कुरा पनि नयाँ होइन। संगठन अब उसो श्रमिकहरुको वैधानिक अधिकारको निम्ति कटिवद्ध रहेर शोषण र अत्याचार विरुद्ध विद्रोही आवाज मात्र होइन तर सडकदेखि अदालतसम्म आन्दोलित हुने चेतावनी दिएको छ।