अप्पर नोरका भागोप्रमो समर्थकहरूले समाए आइजीजेएफको झण्डा

पुल बिजनबारी समष्टि अन्तर्गत अप्पर नोर पंचायतको भारतीय गोर्खा प्रजातान्त्रिक मोर्चाको समर्थकहरूले इण्डियन गोर्खा जनशक्ति फ्रण्टमाथि आस्था र भरोसा राख्दै पार्टीको झण्डा समाए। बिहीबार पुल बिजनबारी समष्टि अन्तर्गत अप्पर नोर ग्राम पंचायतमा इण्डियन गोर्खा जनशक्ति फ्रण्टको सभा आयोजन गरिएको थियो। सभामा इण्डियन गोर्खा जन शक्ति फ्रण्टको केन्द्रीय कार्यकारिणी सदस्य एनबी खवास विशेष रूपमा उपस्थित रहेका थिए। त्यसरी नै दार्जीलिङ महकुमा समिति अध्यक्ष पुरण तामाङ, सभासद प्रतीम सुब्बा, आइजीजेएफ पुल बिजनबारी समष्टिको पक्षबाट भीम सुब्बा, प्रमोद लावती, राजेन सुब्बा, रविन सुब्बा आदि उपस्थित रहेका थिए। सभालाई अप्पर नोर ग्राम पंचायत क्षेत्रका भारतीय गोर्खा प्रजातान्त्रिक मोर्चाको कार्यकर्ता तथा समर्थकहरूले इण्डियन गोर्खा जन शक्ति फ्रण्टले मात्र भारतीय गोर्खाहरूको दीर्घकालीन समस्यालाई समाधान गर्न सक्छ भन्ने आस्था र भरोसा गरेर पार्टीको झण्डा समाएको बताए। आयोजित सभालाई आइजीजेएफको केन्द्रीय कार्यकारिणी सदस्य एनबी खवास, सभासद प्रतीम सुब्बा र महकुमा समिति अध्यक्ष पुरण तामाङले भारतीय गोर्खाहरूको जातीय परिचय र राजनैतिक सुरक्षाको समस्यालाई इण्डियन गोर्खा जन शक्ति फ्रण्टले मात्र समाधान गर्न सक्छ भन्ने ठोकुवा गरेका थिए। इण्डियन गोर्खा जनशक्ति फ्रण्टले आफ्नो गठनकालदेखि माटो पनि नछोड्ने अनि बाटो पनि नछोड्ने स्पष्टसंग बताउँदै आएको छ। माटो भन्नाले अलग राज्य गोर्खाल्यान्ड हो अनि बाटो भन्नाले विकास रहेको बारम्बार बताउँदै आइरहेको छ। इण्डियन गोर्खा जन शक्ति फ्रण्ट सत्तामा छैन, तर पनि जनताले भोग्न परेको समस्याहरू समाधान गर्न निरन्तर लागिपरेको छ। आफ्नो गोजीको पैसाले पुलहरूको निर्माण, बाटोहरूको निर्माण, समाज घर, सार्वजनिक भवन आदि जस्ता बुनियादीहरू कुराहरूको श्रमदानको माध्यमद्वारा तीब्रगतिमा निर्माण गर्दै आइरहेको छ।