दिल्लीको पश्चिमी क्षेत्र उत्तम नगर मा होली पर्वका क्रममा भएको सामान्य विवादले हिंसात्मक रूप लिएपछि एक युवकको ज्यान गएको घटनामा प्रहरीले थप चार जनालाई पक्राउ गरेको छ। यससँगै उक्त घटनामा पक्राउ पर्नेहरूको संख्या आठ पुगेको छ भने एक नाबालिगलाई पनि नियन्त्रणमा लिइएको छ।प्रहरीका अनुसार घटना होलीका दिन उत्तम नगरको जेजे कॉलोनी क्षेत्रमा भएको हो। होली खेल्ने क्रममा एक नाबालिग बालिकाले फ्याँकेको पानीले भरिएको बलुन छिमेकी महिला तर्फ लागेपछि दुई परिवारबीच विवाद सुरु भएको बताइएको छ। सामान्य भनाभनबाट सुरु भएको झगडा केही समयमै हिंसात्मक झडपमा परिणत भएको थियो।
झडपका क्रममा २६ वर्षीय युवक तरुण माथि समूहले आक्रमण गरेको आरोप छ। उनलाई लाठी, ढुंगा तथा अन्य वस्तुले कुटपिट गरिएको बताइएको छ। गम्भीर घाइते अवस्थामा उनलाई अस्पताल लगिएको भए पनि उपचारका क्रममा उनको मृत्यु भएको प्रहरीले जनाएको छ।युवकको मृत्युको खबर फैलिनासाथ क्षेत्रमा तनाव फैलिएको थियो। स्थानीय बासिन्दा तथा केही संगठनका सदस्यहरूले विरोध प्रदर्शन गर्दै सडक अवरुद्ध गरेका थिए। केही स्थानमा सवारीसाधनमा आगजनीसमेत गरिएको थियो, जसका कारण क्षेत्रमा ठूलो सुरक्षा व्यवस्था अपनाइएको थियो।
घटनापछि प्रहरीले हत्याको आरोपमा प्रारम्भमा केही व्यक्तिलाई पक्राउ गरेको थियो भने अनुसन्धानको क्रममा थप चार जनालाई पनि पक्राउ गरिएको हो। घटनामा संलग्न अन्य व्यक्तिहरूको पहिचान गरी पक्राउ गर्न प्रहरीले अनुसन्धान जारी राखेको जनाएको छ।यस घटनापछि उत्तम नगर क्षेत्रमा अतिरिक्त प्रहरी बल तैनाथ गरिएको छ र स्थिति नियन्त्रणमा रहेको बताइएको छ। प्रहरीले सर्वसाधारणलाई शान्ति कायम राख्न आग्रह गर्दै घटनाको निष्पक्ष छानबिन भइरहेको जनाएको छ।
