कडक कुचोको खेतीमा पहाडी कृषकहरू निराश

मजुवा, 14 दिसम्बर (निसं):गत केही वर्षदेखि कुचोको बिक्रीमा कृषकहरू निराश बनिरहेका छन्। विभिन्न नगदेबाली झै कुचो पनि कृषकहरूको निम्ति आयआर्जनको एउटा श्रोत हो। तथापि विगत केही वर्षदेखि भने कुचोको खेतिमा कृषकहरूले धेरै नोक्सान खप्न परिरहेको छ। साधारण त झाडुको रूपमा प्रयोग गरिने यस कुचोको बिक्रीमा प्लास्टिकको झाडु निर्माण गरिएको कारण नै यस कुचोको लेनदेन बन्द भएको व्यापारीहरू अनि जनसाधारणको भनाई छ। कृषकहरूको भनाईमा अम्लिसोको प्रजाति दुई थरिका हुन्छन् । विषेश रैथाने अम्लिसो लचक र अर्को प्रजाति कडक, जसमा लचक कुचोको बजार व्यवस्था तथा बिक्रीमा उस्तो समस्या नरहेको बताइन्छ। तर कडक प्रजातिको कुचो भने बिक्रीमा बजार भाउ एकदमै निम्न रहेको कृषकहरूको गुनासो छ। हालमा प्रायः कृषकहरूले कडक प्रजातिको अम्लिसो धेरै मात्रामा लगाएको छ। विगतमा उक्त प्रजातिका कुचोको दाम प्रति किलो 50 रूपियाँसम्म बिक्री भएको थियो। यसैले कृषकहरू कडक प्रजाति अम्लिसोको खेति प्रति आकर्षित बनेको स्थानीय कृषकहरूले जनाएको छ। यस कुचोको फसल उत्पादन र बजार भाउ राम्रो लागे खेतिवाल बस्ती वासीहरूको एउटा आड हुने उनिहरूको भनाई छ। हालमा कुचोको फसल उठाउने समय भईरहेको छ तर बजार भाउ खस्किएको कारण यसले निराशा मात्रै होइन आफु खटिएको दैनिक पारिश्रमिक सम्म पनि उठाउन नसकिने कृषकहरूको दुखेसो रहेको छ।