सरकारी निकायमा भ्रस्टाचार यस्तो छ, पहाडको अवस्था, सात लाख रुपैयाँ दिन नसक्दा नोकरी गुमाउन परेकी छोरीलाई न्याय दिलाउन उच्च न्यायालय जाने इण्डियन गोर्खा जनशक्ति फ्रन्टका केन्द्रीय संयोजक अजय एडवर्ड्सले बताएका छन्। किनकि कालेबुङकी ती गोर्खे छोरीले सात लाख रुपैयाँ दिन नसक्दा कालेबुङ अस्पतालमा नियुक्ति नपाउनु अत्यन्तै दुर्भाग्यपूर्ण घटना हो।
एडवर्ड्सले बताए, गत दिन विशेष कार्यले म कालेबुङ भ्रमणमा गएको थिएँ। सो क्रममा मैले थाहा पाएँ कि कालेबुङकी एक युवतीले कालेबुङ अस्पतालमा कामको नियुक्ति पत्र प्राप्त गरेकी थिइन्। तर नियुक्ति पत्र प्राप्त गरेकै बेलुका एक व्यक्तिले उनलाई र उनको परिवारलाई फोन गरेर सात लाख रुपैयाँको माग गरे। पहिले दुई लाख रुपैयाँ र त्यसपछि बाँकी पाँच लाख रुपैयाँ दिनुपर्ने माग गरिएको थियो।
उक्त युवतीले परीक्षा पास गरेर योग्यताका आधारमा नियुक्ति पत्र प्राप्त गरेकी थिइन्। तर नियुक्ति पत्र पाएपछि राति फोन गरेर रकम माग गरिनु अत्यन्तै गम्भीर विषय हो। पहिले दुई लाख रुपैयाँ र नियुक्ति भएपछि बाँकी पाँच लाख रुपैयाँ दिनुपर्ने सर्त राखिएको थियो। जब ती युवतीले आफूसँग यति धेरै रकम नभएको जानकारी गराइन्, तब मेडिकल अस्पतालमा कार्यभार सम्हाल्नुअघि नै उनलाई निष्कासन पत्र थमाइयो।
कालेबुङका शिक्षित युवा–युवतीहरूले पढेर पनि नोकरीका लागि पैसा तिर्नुपर्ने र पैसा दिन नसके नियुक्ति नपाउनु भन्दा ठूलो दुर्भाग्य अरू के हुन सक्छ ? एडवर्ड्सले बताए, म ती छोरीको नाम सार्वजनिक गर्नेछैनँ, तर उनलाई न्याय दिलाउन उच्च न्यायालयमा याचिका दर्ता गर्नेछु।
