इन्डियन आइडल सिजन–३ का विजेता, सुप्रसिद्ध गायक तथा अभिनेता, दार्जीलिङ निवासी स्व. प्रशान्त तामाङको आकस्मिक निधनको दुःखद समाचारले गोर्खा राष्ट्रिय मुक्ति मोर्चा अत्यन्तै मर्माहत तथा शोकाकुल भएको छ। उहाँको असामयिक निधनले दार्जीलिङ क्षेत्र मात्र होइन, सम्पूर्ण देशभर गोर्खा तथा भारतीय समाजमा गहिरो शोकको वातावरण सिर्जना भएको छ। स्व. प्रशान्त तामाङले आफ्नो अद्वितीय स्वर, अथक परिश्रम र अनुशासित जीवनशैलीमार्फत भारतीय सांगीतिक जगतमा विशिष्ट पहिचान स्थापित गर्नुभएको थियो। इन्डियन आइडलजस्तो प्रतिष्ठित राष्ट्रिय मञ्चबाट विजय हासिल गर्दै उहाँले दार्जीलिङ र गोर्खा समुदायको नाम राष्ट्रिय तथा अन्तर्राष्ट्रिय स्तरमा उजागर गर्न महत्वपूर्ण योगदान पुर्याउनुभएको थियो। संगीत र अभिनय दुवै क्षेत्रमा उहाँले पुर्याउनुभएको योगदान सधैं स्मरणीय रहनेछ।
उहाँ केवल एक सफल कलाकार मात्र नभई सरल, विनम्र र अनुकरणीय व्यक्तित्वका धनी हुनुहुन्थ्यो। उहाँको निधनले सांगीतिक क्षेत्रले मात्र होइन, सम्पूर्ण समाजले एक अमूल्य प्रतिभाशाली व्यक्तित्व तथा सांस्कृतिक गौरव गुमाएको छ।
यस अत्यन्तै दुःखद घडीमा गोर्खा राष्ट्रिय मुक्ति मोर्चा स्व. प्रशान्त तामाङप्रति हार्दिक श्रद्धाञ्जली अर्पण गर्दछ तथा शोकसन्तप्त परिवारजन, आफन्तजन र शुभचिन्तकहरूप्रति गहिरो शोक समवेदना व्यक्त गर्दछौं। दिवंगत आत्माको चिरशान्तिको कामना गर्दै यो अपूरणीय क्षति सहन सक्ने धैर्य र शक्ति परिवारजनलाई प्राप्त होस् भनी हार्दिक प्रार्थना गर्दछौं।
स्व. प्रशान्त तामाङको योगदान, संघर्ष र स्मृति सधैं हाम्रो हृदय र इतिहासमा अमर रहनेछ।
