गोर्खा राष्ट्रिय मुक्ति मोर्चा ऋषीहाट–ब्लूमफिल्ड समष्टिको एक जरुरी सभा धोजवीर धुरा डालीस्थित सामाजिक भवनमा सम्पन्न भयो। सभाको अध्यक्षता आर्य चियाबारी गोरामुमो शाखाका हस्तबहादुर तामाङले गर्नुभएको थियो भने कार्यक्रमको सञ्चालन समष्टि सचिव सत्यन राईले गर्नुभएको थियो। सभामा समसामयिक राजनीतिक परिस्थिति तथा संगठनात्मक विषयहरूमा विस्तृत रूपमा चर्चा–परिचर्चा गरिएको थियो। विशेष गरी हालै सम्पन्न विधानसभा चुनावको परिणामपछि उत्पन्न राजनीतिक समीकरण, पश्चिम बंगालमा भारतीय जनता पार्टी (भाजपा) ले हासिल गरेको ऐतिहासिक सफलता तथा गोरामुमो एक घटक दलका रूपमा आगामी राजनीतिक रणनीति कसरी निर्माण गर्ने भन्ने विषयमा गम्भीर विचार–विमर्श गरिएको थियो।
सभामा वक्ताहरूले ऋषीहाट–ब्लूमफिल्ड समष्टि गोरामुमोको एक सशक्त तथा ऐतिहासिक समष्टि भएको उल्लेख गर्दै यस क्षेत्रलाई अझ सुदृढ र सक्रिय बनाउनु समयको आवश्यकता रहेको बताए। संस्थापक अध्यक्ष स्वर्गीय सुवास घिसिङको विशेष माया र विश्वास रहेको यस समष्टिलाई संगठनात्मक रूपमा अझ मजबुत बनाउने प्रतिबद्धता व्यक्त गरिएको थियो।समष्टिका सभापति स्वर्गीय किशोर राईको असामयिक निधनपछि रिक्त रहेको सभापति पदबारे पनि छलफल भएको थियो। हालका लागि उक्त पद यथावत् राख्दै आगामी दिनमा पार्टीप्रति निष्ठावान, सक्षम र हरेक परिस्थितिमा संगठनलाई नेतृत्व दिन सक्ने व्यक्तिलाई सर्वसम्मत रूपमा चयन गर्ने निर्णय सभाले गरेको छ।
त्यसैगरी, समष्टि अन्तर्गत आगामी दिनहरूमा विभिन्न पार्टीगत कार्यक्रमहरू सञ्चालन गर्ने तथा पार्टी अध्यक्ष मन घिसिङको कुशल नेतृत्वप्रति पूर्ण विश्वास व्यक्त गर्दै उहाँकै मार्गदर्शन र सरसल्लाहअनुसार अघि बढ्ने संकल्प समेत सभाले गरेको छ।
सभाको प्रारम्भमा समष्टिका स्वर्गीय सभापति किशोर राई तथा अरेन्ज भ्याली शाखाका स्वर्गीय विक्रम मुखियाको चिरशान्तिको कामना गर्दै दुई मिनेट मौनधारण गरिएको थियो।उक्त सभामा डाली धोजवीर धुरा शाखा, ऋषीहाट खसमल शाखा, ऋषीहाट टी.ई. शाखा, अरेन्ज भ्याली शाखा, आर्य शाखा तथा बरबटे शाखाका गोरामुमो समर्थक प्रतिनिधिहरूको उल्लेखनीय उपस्थिति रहेको थियो।
