असमको शोणितपुर जिल्लाको तेजपुरस्थित चान्दमारी क्षेत्रमा अखिल असम गोर्खा छात्र संघ (AAGSU) ले आफ्नो स्वर्ण जयन्ती वर्षलाई स्मरणीय बनाउने लक्ष्यसहित “स्वर्ण जयन्ती भवन” निर्माण कार्य औपचारिक रूपमा सुरु गरेको छ। गोर्खा समुदायको शैक्षिक उन्नति, सामाजिक एकता तथा संगठनात्मक गतिविधिहरूलाई बलियो बनाउने सोचका साथ यो भवन निर्माण अघि बढाइएको बताइएको छ।
कार्यक्रममा AAGSU का केन्द्रीय सभापति श्रीमान सुनिल छेत्रीको विशेष उपस्थितिमा धार्मिक परम्परा अनुसार भूमिपूजन तथा शिलान्यास सम्पन्न गरिएको थियो। शुभकार्यको आरम्भसँगै उपस्थित व्यक्तिहरूमा उत्साह र सकारात्मक ऊर्जा देखिन्थ्यो। धेरैले यस पहललाई समुदायको भविष्यसँग जोडिएको दूरदर्शी कदमका रूपमा व्याख्या गरेका छन्।
भवन तयार भएपछि यहाँ AAGSU को केन्द्र, जिल्ला र स्थानीय आञ्चलिक समितिहरूका लागि अस्थायी कार्यालय स्थापना गरिनेछ। त्यस्तै, आगन्तुकहरूका लागि अतिथिशाला तथा विद्यार्थीहरूलाई अध्ययनमा सहयोग पुर्याउने उद्देश्यले पुस्तकालय पनि सञ्चालनमा ल्याइने योजना रहेको छ। यसले नयाँ पुस्तालाई सिकाइ, छलफल र रचनात्मक गतिविधिमा सहभागी हुन थप अवसर दिने अपेक्षा गरिएको छ।
उक्त कार्यक्रममा AAGSU शोणितपुर जिल्ला सभापति दीपक सुब्बा, समाजसेवी व्यक्तित्वहरू, बुद्धिजीवी, स्थानीय प्रतिनिधि तथा समुदायका सदस्यहरूको उल्लेखनीय सहभागिता रहेको थियो। वक्ताहरूले “स्वर्ण जयंती भवन” लाई केवल भौतिक संरचना नभई गोर्खा समुदायको एकता, पहिचान र सामूहिक प्रगतिलाई झल्काउने प्रतीकका रूपमा वर्णन गरे।
स्वर्ण जयन्तीको अवसरमा सुरु गरिएको यो परियोजनाले भविष्यमा शिक्षा, सामाजिक सेवा, नेतृत्व विकास तथा विभिन्न सामुदायिक कार्यक्रमहरू सञ्चालन गर्न महत्वपूर्ण भूमिका खेल्ने विश्वास गरिएको चन्दन गुरूङले जानकारी दिएका छन्।
