रोहिणी टोल बन्द गर्न गोरामुमोको घोषणा, कुनै पनि गाडीबाट ट्याक्स नलिने

रोहिणी टोल प्लाजा बन्द गर्न गोरामुमोको घोषणा, अब कुनै पनि गाडीबाट ट्याक्स नउठाइने बताएको छ। गोर्खा राष्ट्रिय मुक्ति मोर्चा (गोरामुमो) ले रोहिणीस्थित टोल प्लाजालाई बन्द गर्ने घोषणा गर्दै आजदेखि कुनै पनि सवारी साधनबाट ट्याक्स उठाउन नदिने स्पष्ट पारेको छ। पार्टीका अनुसार उक्त सडक स्वर्गीय सुवास घिसिङको पहलमा सर्वसाधारण जनताको सहज आवतजावतका लागि निर्माण गरिएको थियो, त्यसैले जनतामाथि अतिरिक्त आर्थिक भार थोपर्ने कार्य स्वीकार्य नहुने बताइएको छ। गोरामुमोले वर्तमान जीटीए प्रशासनले रोहिणी सडकमा अवैध रूपमा ट्याक्स संकलन गरिरहेको आरोप लगाउँदै संकलित रकमको दुरुपयोग भइरहेको दाबी गरेको छ। पार्टीले अब उप्रान्त कुनै पनि चालक तथा सर्वसाधारणले उक्त टोल प्लाजामा ट्याक्स नतिर्न अनुरोध समेत गरेको छ। यस विषयमा जानकारी दिँदै गोरामुमो खरसाङ महकुमा समिति अध्यक्ष निमा लामा लगायत युवा प्रतिनिधिहरूले जनहितविपरीत हुने कुनै पनि निर्णयको पार्टीले कडा विरोध गर्ने बताएका छन्। उनीहरूले रोहिणी सडक जनताको सम्पत्ति भएकाले जनतामाथि जबर्जस्ती कर थोपर्न नहुने धारणा व्यक्त गरेका छन्। गोरामुमोले जनताको पक्षमा निरन्तर आवाज उठाइरहने प्रतिबद्धता व्यक्त गर्दै आवश्यक परे थप आन्दोलनका कार्यक्रमसमेत अघि बढाइने संकेत दिएको छ।