गौतम देब ले आगामी विधानसभा निर्वाचनलाई लक्षित गर्दै चुनावी अभियान सुरु गरेका छन्। हाल उनी सिलगढीका मेयर हुन्। निर्वाचन आयोगले अझै औपचारिक रूपमा चुनाव मिति घोषणा नगरे पनि राजनीतिक गतिविधि भने तीव्र बन्दै गएको देखिएको छ।
गौतम देब स्वयं कार्यकर्तासहित सडकमा उत्रिएर भित्तामा चुनावी नारा लेख्ने अभियानमा सहभागी भएका थिए। विभिन्न वार्ड र सार्वजनिक स्थानहरूमा पार्टीका सन्देश तथा नाराहरू लेखिँदै जनतालाई आकर्षित गर्ने प्रयास गरिएको छ। भित्ते लेखन (वाल राइटिङ) मार्फत मतदातासम्म सीधा सन्देश पुर्याउने रणनीति अपनाइएको बताइएको छ।
स्थानीय राजनीतिक वातावरण क्रमशः तातिँदै गएको छ। अन्य दलहरूले पनि आ–आफ्नो तयारी सुरु गरिरहेका छन्। यसैबीच, गौतम देबको यो पहललाई आगामी विधानसभा चुनावको पूर्वतयारीको रूपमा हेरिएको छ। चुनाव घोषणा हुनुअघि नै मैदानमा सक्रिय देखिनु राजनीतिक दृष्टिले महत्वपूर्ण मानिएको छ।
