केन्द्रले स्मार्टफोन किन्न उपलब्ध गराएको रकम अधुरो

पश्चिम बंगाल आँगनवाडी कर्मचारी एवं सहायिका कल्याण समिति, जोरबङ्लो–सुकेपोखरी शाखाले राज्य सरकारले एकीकृत बाल विकास परियोजनाअन्तर्गत आँगनवाडी कार्यकर्ताहरूलाई 5G स्मार्टफोन किन्नका लागि उपलब्ध गराएको १० हजार रुपैयाँको अनुदानविरुद्ध आज तीब्र विरोध जनाएको छ। समितिका प्रतिनिधिहरूले आज सुकेपोखरी स्थित बाल विकास परियोजना कार्यालयमा परियोजना अधिकृत रिञ्छेन लामा यल्मोलाई ज्ञापन पत्र बुझाउँदै राज्यको निर्णयप्रति आपत्ति जनाए। समितिकी सभानेत्री फुर्बा किमाका अनुसार केन्द्र सरकारले सन् २०२१ र २०२३ मा क्रमशः १० हजार र ८ हजार रुपैयाँको सहयोग उपलब्ध गराएको भए पनि यसपटक राज्य सरकारले मात्र १० हजार रुपैयाँ उपलब्ध गराएको र बाँकी ८ हजार रकम गायब भएको जनाएकी छिन्।