४२ नम्बर समष्टि अन्तर्गत आज तीनवटा महत्वपूर्ण ग्रामीण सडक निर्माण योजनाको शिलान्यास कार्यक्रम सम्पन्न भएको छ। कार्यक्रमका प्रमुख अतिथि रुदेन सादा लेप्चा तथा विशिष्ट अतिथि सभासद हेमन्त राईको उपस्थितिमा शिलान्यास गरिएको हो।
यस अवसरमा याङमाकुम ग्राम पञ्चायत अन्तर्गत देवरालीदेखि चर्च हुँदै टी.के. बस्ती, टावर डाँडादेखि सानो माकुम बस्ती, होम डाँडा लोवर माकुमदेखि सालघारी कम्बलसम्मका सडक निर्माण कार्यको औपचारिक सुरुवात गरिएको छ।
कार्यक्रममा याङमाकुम पञ्चायत प्रधान नविन लामा, समथार ग्राम पञ्चायत प्रधान राजेन गुरुङ, पञ्चायत समिति सदस्य धनराज भुजेल तथा पञ्चायत समिति सदस्य एनबी तामाङ लगायत स्थानीय जनप्रतिनिधि र गाउँवासीको उपस्थिति रहेको थियो।
स्थानीयवासीका अनुसार सडक अभावका कारण बिरामी, विद्यार्थी तथा ज्येष्ठ नागरिकहरूलाई आवतजावतमा ठूलो समस्या भोग्नुपरेको थियो भने कृषकहरूले पनि आफ्नो उत्पादन बजारसम्म पुर्याउन कठिनाइ सामना गर्दै आएका थिए। अब सडक निर्माणसँगै यातायात सहज हुने, दैनिक जीवनमा सुविधा थपिने र ग्रामीण अर्थतन्त्रमा सकारात्मक प्रभाव पर्ने अपेक्षा गरिएको छ।
यसैबीच गाउँवासीहरूले यस्तो विकास कार्यलाई निरन्तरता दिन सक्ने नेतृत्व नै आफ्नो आवश्यकता भएको बताएका छन्। गाउँको समग्र विकासमा सक्रिय भूमिका निर्वाह गर्दै आएको उल्लेख गर्दै आगामी चुनावमा पनि रुदेन सादा लेप्चालाई नै पुनः विधायक बनाउनुपर्ने जनआकांक्षा रहेको स्थानीयको भनाइ छ।
