नागरी–धजे समष्टि अन्तर्गत धजे चियाबारी न्यू रोड फ्याक्ट्रीदेखि नागरी फार्मसम्म पुग्ने बहुप्रतिक्षित ऐतिहासिक बाटोको विधिवत् शिलान्यास शुक्रबार सम्पन्न भयो। उक्त शिलान्यास कार्यक्रममा जीटीए सभाध्यक्ष एवं नागरी–धजे समष्टि सभासद अञ्जुल चौहान विशेष रुपमा उपस्थित रहेका थिए भने केन्द्रीय समिति सदस्य बी.बी. राईको बाहुलीबाट शिलान्यास सम्पन्न गरियो।
वर्षौंदेखि क्षेत्रवासीहरूको अपेक्षामा रहेको यस बाटो निर्माण कार्य शुरु हुनु नागरी–धजे समष्टिका लागि महत्वपूर्ण उपलब्धि हो।
यस ऐतिहासिक बाटो निर्माण सम्भव बनाउन सहयोग पुर्याउने जीटीए मुख्य कार्यपाल अनित थापाप्रति चौहानले हार्दिक आभार प्रकट गरेका छन्।
बाटो निर्माण कार्य समयमै र गुणस्तरीय रूपमा सम्पन्न होस् भन्ने उद्देश्यले धजे चियाबारीका प्रबन्धक तथा ठेकेदार पक्षसँग आवश्यक छलफल र समन्वय पनि गरिएको छ।
यस परियोजनाले स्थानीय आवागमन सहज बनाउनुका साथै श्रमिकवर्ग, विद्यार्थीवर्ग तथा आम नागरिकको दैनन्दिन जीवनमा सकारात्मक परिवर्तन ल्याउने विश्वास लिएको चौहानले बताए।
यस अवसरमा नागरी–धजे समष्टि क्षेत्रमा हालसम्म जीटीएद्वारा सञ्चालित विभिन्न विकास योजनाहरू तथा पूर्वाधार निर्माण कार्यका लागि जीटीएप्रति चौहानले हार्दिक धन्यवाद व्यक्त गरे। जीटीएको निरन्तर सहयोग र प्रतिबद्धताकै कारण यस क्षेत्रको समग्र विकास क्रमशः अघि बढिरहेको छ भन्ने कुरामा विश्वस्त रहेको उनले बताए।
उक्त शिलान्यास कार्यक्रममा किशोर छेत्री, सञ्जय गिरी, कुसुम राई, योगेन प्रधान, पोख्रेबुङ ग्राम पञ्चायत–३ का उप–प्रधान अजय सुब्बा लगायत धेरै संख्यामा क्षेत्रबासीहरूको उपस्थिति रहेको थियो। उपस्थित सबैप्रति सभासद अञ्जुल चौहानले हार्दिक धन्यवाद व्यक्त गरे। नागरी–धजे समष्टिको समग्र विकासका लागि यस्ता आधारभूत पूर्वाधार निर्माण कार्यलाई भविष्यमा पनि उच्च प्राथमिकतामा राख्दै अघि बढ्ने प्रतिबद्धता उनले व्यक्त गरे।
