दार्जीलिङ गोर्खा पार्वत्य परिषद गठन भए पश्चात् मङ्पु लाटपञ्चर समष्टि क्षेत्रबाट दोस्रो अनि तेस्रो सत्र गरि १० वर्ष पार्षद बनेका के०बी०गुरुङको हिज १९ फरवरीको दिन निधन भयो। गत १३ फरवरीदेखि तिनको स्वास्थमा केही गडबडी आएपछि सिलिगढीको एउटा निजी नर्सिङ होममा उपचाराधीन थिए भने उपचारकै क्रममा तिनलाई सिलगढीबाट कालेबुङ्ग लगिएको थियो, जहाँ पार्षद गुरुङले अन्तिम सास लिएका थिए। भनिन्छ विद्यार्थी जीवनदेखि नै जाति भाषा माटोप्रेमी तिनी १९८४ सालदेखि गोरामुमो संस्थापक सुवास घिसिङको संसर्गमा आएका थिए। ८६ सालमा स्व० सुवास घिसिङको नेतृत्वमा शुरु भएको गोर्खाल्यान्ड आन्दोलनको शुरुआती समयमा स्व० के०बी० गुरुङको निम्तोमा लाटपञ्चरमा गोरामुमोको विराट जनसभा सम्पन्न भएको भनाइ रहेको छ। ईमानदार र कुशल नेतृत्व भएकोले दागोपाप चुक्तिको पाँच वर्षपछि निर्दलीय प्राथीको रुपमा जनप्रतिनिधि भए अनि दोस्रो सत्रमा गोरामुमो उम्मेदवार बनेर जनसेवामा लगनशील रहेका थिए। यसैगरी वर्तमान भागोप्रमो पार्टीमा पनि उच्च ओहोदामा रहेर क्षेत्रलाई नेतृत्व गर्दै आएका थिए। तिनको निधनप्रति भागोप्रमो अध्यक्ष अनित थापा लगायत तिनका समकालीन शुभचिन्तक एवं विभिन्न संघसंस्था राजनीतिक संगठन आदिले गहिरो शोक प्रकट गरेका छन्।
