इण्डियन गोर्खा जनशक्ति फ्रन्टको अम्बटे क्षेत्र अन्तर्गत कुमालटार बुथको औपचारिक गठन सम्पन्न
आज इण्डियन गोर्खा जनशक्ति फ्रन्टको अम्बटे क्षेत्र अन्तर्गत कुमालटार बुथको औपचारिक गठन सम्पन्न भएको छ। उक्त कार्यक्रम उत्साहजनक वातावरणमा सम्पन्न भएको थियो।
यस ऐतिहासिक अवसरमा पार्टीका केन्द्रीय कार्यसमिति सदस्य तथा प्रवक्ता आर.के. शर्मा, केन्द्रीय कार्यसमिति सदस्य, इण्डियन गोर्खा जनशक्ति फ्रन्ट, कर्सियाङ लगायत चिम्नी–देवराली ग्राम पञ्चायतका प्रधान तथा केन्द्रीय कार्यसमिति सदस्य बिमल तामाङको विशेष उपस्थिति रहेको थियो।
कार्यक्रममा स्थानीय कार्यकर्ता तथा समर्थकहरूको उल्लेखनीय सहभागिता देखिएको थियो। उपस्थित नेताहरूले संगठन सुदृढीकरण, जनसम्पर्क विस्तार तथा गाउँस्तरमा पार्टीको आधार मजबुत बनाउने प्रतिबद्धता व्यक्त गरे।
केन्द्रीय कार्यसमिति सदस्य तथा प्रवक्ता आर.के. शर्माले आफ्नो मन्तव्यमा अम्बटे क्षेत्रमा संगठनलाई अझ सक्रिय, जनमुखी र अनुशासित रूपमा अघि बढाउने बताउँदै युवाशक्ति र आम जनताको सक्रिय सहभागिताले मात्र सशक्त परिवर्तन सम्भव हुने धारणा राख्नुभयो। उहाँले कर्सियाङ क्षेत्रसहित सम्पूर्ण पहाडमा पार्टीको संगठनलाई बलियो बनाउँदै जनताको आवाज बुलन्द गर्ने प्रतिबद्धता व्यक्त गर्नुभयो।
यसैगरी, बिमल तामाङले ग्रामस्तरबाटै सशक्त संगठन निर्माण गर्नुपर्ने आवश्यकता औंल्याउँदै कुमालटार बुथ गठनले क्षेत्रीय राजनीतिक सशक्तिकरणमा महत्वपूर्ण भूमिका खेल्ने विश्वास व्यक्त गर्नुभयो।
कुमालटार बुथ गठनसँगै इण्डियन गोर्खा जनशक्ति फ्रन्टले अम्बटे क्षेत्रमा आफ्नो संगठनात्मक आधार थप सुदृढ बनाएको छ। स्थानीय विकास, जनअधिकार तथा पारदर्शिताका सवालमा पार्टीले निरन्तर आवाज उठाउने प्रतिबद्धता समेत व्यक्त गरिएको इण्डियन गोर्खा जनशक्ति फ्रन्ट,केन्द्रीय कार्यसमिति सदस्य आर.के. शर्माले जानकारी दिएका छन्।
