संगीतकार विकास सिंह लोहारलाई सम्मानसहित बिदाइ

अवकाशप्राप्त कर्मचारी एवं तबला वादक साथै वरिष्ठ संगीतकार विकास सिंह लोहारलाई सम्मानसहित बिदाइ दिनलाई आकाशवाणी खरसाङमा बिदाइ समारोहको आयोजन बुधबार गरिएको थियो।‌ आकाशवाणी खरसाङको मनोरञ्जन क्लबको आयोजनामा सम्पन्न उक्त बिदाइ समारोहमा विशेष रुपमा क्लष्टर हेड एवं निदेशक अभियन्ता जितेनकुमार रोय प्रमुख अतिथिको रुपमा उपस्थित रहेका थिए। वरिष्ठ उदघोषक उमेश कार्कीटोलीले सञ्चालन तथा स्वागत सम्भाषण राखेको कार्यक्रममा विभिन्न सांगीतिक प्रस्तुतिहरु दिइएको थियो। कार्यक्रममा बिदायी कर्मचारी विकाससिंह लोहारलाई आकाशवाणी खरसाङको तर्फबाट श्रद्धार्पणसहित टोपी र शल ओढाएर सम्मान जनाइएको थियो भने अभिनन्दन पत्र, स्मृति चिन्ह र उपहारहरु प्रदान गरिएको थियो। उनलाई प्रदान गरिएको अभिनन्दन पत्र उदघोषिका रश्मी खवासले पठन गरेकी थिइन्। यस अवसरमा विकास सिंह लोहार र उनकी पत्नी सुचिता खातीको बाहुलीबाट केक काटिएको थियो‌। यस बिदाइ समारोहमा गीत, नृत्य, कविता आदि प्रस्तुत गरिएको थियो। कार्यक्रममा प्रमुख अतिथि निदेशक अभियन्ता एवं क्लष्टर हेड जितेन्द्रकुमार रोय, कार्यक्रम प्रमुख सुनिलकुमार दास, कार्यक्रम निष्पादक राजीव सुब्बा आदिले वक्तव्य राखेका थिए भने बिदाइ कर्मचारी विकाससिंह लोहार र उनकी पत्नी सुचिता सिंह खातीले पनि वक्तव्य राखेका थिए। यस अवसरमा पत्नी एवं गायिका सुचिता सिंह खातीले गीत पनि प्रस्तुत गरेकी थिइन्।