दार्जीलिङ, 15 जुलाई (निसं): ईजा प्रकाशनले यसपाली 12औं ईजा प्रतिभा सम्मान वरिष्ठ गायक एवं संगीतकार राम विष्ट र नर्तकी बसन्ती शाहलाई प्रदान गर्ने घोषणा गऱ्यो। यसरी नै तेस्रो ईजा स्मृति युवा साहित्यिक सम्मान पुरस्कार आसामको तेजपुर निवासी सन्तोष रावतलाई प्रदान गर्ने घोषणा गरिएको छ। सन्तोष रावतको निबन्ध संग्रह 2021-मा प्रकाशित भएको थियो, जुन संग्रहलाई तेस्रो ईजा स्मृति युवा साहित्यिक सम्मान पुरस्कारको लागि चयन गरिएको ईजा प्रकाशनका सचिव सुनिल राईले जानकारी गराए। यी पुरस्कारहरू आगामी 10 अगस्तको दिन स्थानीय नेपाली साहित्य सम्मेलनको सूधपा सभागृहमा एक कार्यक्रममाझ प्रदान गरिने भएको छ। यसै कार्यक्रममाझ यसै ईजा प्रकाशनका उपाध्यक्ष नुरन राईद्वारा लेखिएको दुईवटा पुस्तकको पनि विमोचन गरिने भएको छ। सोमबार दार्जीलिङ प्रेस गिल्डमा एक पत्रकार सम्मेलनको आयोजना गरी ईजा प्रकाशनले यसको जानकारी गराएको हो। स्मरण गराइन्छ, रंगली रंगलीयट खण्डअन्तर्गत पुबोङ चियाबारी निवासी राम विष्टले 50 वर्षदेखि अनवरतरूपमा गायन क्षेत्रमा आफ्नो योगदान दिँदै आइरहेका छन् भने लगभग त्यसै समयदेखि नर्तकी बसन्ती शाहले पनि नृत्य क्षेत्रमा काम गर्दै आइरहेकी छन्। जसले हाल नृत्य निर्देशन गरेर कैयौं नर्तकीहरूलाई पोख्त बनाइसकेकी छन्। उनीहरूको यसै योगदानको कदर गर्दै ईजा प्रकाशनले यसपाली उनीहरूलाई सम्मान जनाउने निधो गरेको हो।
